Ich Vlreich von Meyssowe Marschalich in Osterrich Vergich vnd tun chunt allen den, die disen brief sehent oder horent lesen, die nu sint vnd hernach chunftig werdent, Daz ich redlich vnd reht gechouffet han wider den piderben man hern Rudgern den Piber vnd wider sein Housvrowen vron Diemuten vnd wider alle sein erben daz Hous ze Gruenberch vnd allez, daz dar zue gehort, daz sein vreiz aigen gewesen ist her von alter gepaun vnd vngepaun, gestift vnd vngestift, versucht vnd vnuersucht, holtz, Ekcher, wismad vnd swie iz genant ist vmb Sehs hundert pfunt vnd vmb zwaintzig pfunt wienner pfenning vnd han ich in der gewert redlich vnd recht. Nu han ich daz vorgnant hous haizzen prechen vnd zelegen auz von grunt vnd han daz vorgnant Gruenberch vnd swaz do zue gehort, gegeben mit verdahtem muet zu der zeit, do ich iz wol getun moht vnd scholt, mit zeitigem rat aller meiner vreunt vnd Erben meiner vrowen vron Elspeten ze der zeit Aptissinne vnd aller der Samnung in daz Chloster hintz sant Pernhart mit allem den reht vnd iz der egnant Rudger der Piber vnd sein vordern gehabt habent, durch meins vater sel willen vnd durch meiner vordern vnd nachchomen sel willen, daz si di gult furbaz ewichlich in nutz vnd in gewer haben schullen, der dem Chloster nutz vnd guet ist vnd pin auch des vorgnanten guetes meiner egenanten vrowen scherm vnd gewer als aigens reht ist vnd nach des Landes reht ze Osterrich. Swelichen schaden si daran nemen mit dem rehten, den schol ich in gelten vnd ablegen an alle widerrede. Daz nu die rede also stet gantz vnd vnzeprochen beleibe, so gib ich in disen brief zu ainem offenn gezeug vnd zu ainer steten vestnung diser sache versigelten mit meim Insigel vnd mit der Erbern herren Insigel mein Ohaims Graf Pertoldes von Hardeke vnd meins swagers hern Chvnrates von Schawenberch, die der rede gezeug sint mit sampt ier Insigeln vnd auch mit den erbern gezeugen, die hernach geschriben sint, her Hainreich von Cheyowe, her Ott von Cheyowe, her Hauke der Tuers, her Reimpreht der Tuers, her Olber der Streun, her wernhart der Streun vnd ander frum leut genuech, den die sache wol chunt vnd gewizzen ist. Der brief ist gegeben, do von Christes gepurt waren ergangen Tausent iar drevhvndert iar vnd darnach in dem ainsmenzwaintzigisten Jar des nahsten svnnetags nach Ostern.

Source Fulltext: OÖUB 5 (Wien 1868), S. 291-292, Nr. 300