Ich Meinhart der chamrer vergich vnd tven chvnt allen den, di disen prief sehent oder ho^erent lesen, daz ich mit verdahtem mvet vnd mit meinem gveten willen vnd mit meiner havsvrowen vron Levkarten gvetem willen hern Ortweinen von waldpvrch verseczet han ze rehtem sacz di hveb an dem schvczenperig vnd siben raevt dacz harbrvk vnd ein raevt an dem cierperig, da der chv^ercz avf siczet, mit allem dem dienst vnd mit aller der vadrung, di avf denselben gveten leit versveht vnd vnuersvcht fvr zwo vnd dreizzich march lo^etiges silbers wienner gwihtes AJso beschaidenleich, gib ich im sein silber ze weinahten, di nv schierist cho^ement, so ist mein gvet ledich, tven ich des niht, so schol iz im sten von weinahten, di nv^e schierist cho^ement vber ein iar, gib aver ich im sein silber dannoch niht so schol er sein becho^emen von dem vorgenanten sacz, swie er mag mit verseczen oder mit verchavffen, waer aver daz, daz er des egenanten silbers also niht becho^emen mo^eht von den selben gveten, so schol ich im das avz rihten, daz im di vorgenant hveb an dem schvczenperig verlihen werd ze rehtem lehen, als ich sel han von dem von Schav°nwerch, von dem si ze reht lehen ist, taet ich des niht, daz schol er haben avf aller meiner hab vnd schvllen di oht raevt, di vor beschriben sint, sein vnd seiner havsvrowen vnd aller seiner erben sein ledichlich vnd an allen chrieg. Daz di red staet vnd vnzerbrochen beleib, gib ich im disen prief ze einem v^erchvnde mit meinem hangendem insigel vnd mit meins swehers Eberhartes des Popler insigel, der red sind avch gezevg her Benisch von Lozperch, her Bohvnk von harach, der Peter der piber, der Sighart der piber, Chv^enrat der havser, Dietreich vnd Bvsk von harach, Vcz der schaffer vnd anderr pidiber laevt genveg. Der prief ist gegeben, do von Christes gepv^erd ergangen waren Tavsent iar, drevhvnder iar darnach in dem ains vnd zwainczgistem an sand Egidientag.

Source Fulltext: OÖUB 5 (Wien 1868), S. 297-298, Nr. 308