Ich Erohenger von wesen vergieh offenleichen vnd tuen chunt an disem prief allen den, die in sechent oder hörn lesen, die nu sint oder hernach chumftig werden, daz ich mit wol bedaechten muet vnd ze der zeit, da ich ez wol getuen macht, vnd mit zeitigen rat meiner vreunt vnd auch meiner leut meinem Oehaim Hadmaren von ||
waldekk gema^echt vnd gegeben han ledichleichen allev di manscha^eft vnd allev di lechen, di mich an erben von meinen vorvadern hinderhalb der Thuenawe vnd hinderhalb dez Ins vntz gen Saltzpuerch, vnd auch allev di lechen, di ich gechauft han von dem wesenberger vnd vom Jochenstainer oder von weme ichez gechaufet oder gewuennen han oder swerz von mir gehabt hat, iez sein pfoefen oder laien oder swa ichez gehabt han, versuechtez vnd vnversuechtez, vnd auch daz Purchstal datz wesenberch vnd allez daz, daz dar zue gehoert versuechtez vnd vnversuechtez also mit beschaidner red, swenn daz sei, daz Got vber mich piet, daz ich sterbe, daz er mich danne erberleichen ze der erd bestatten schol datz Engelcell in dem Chloster, alz seinen trewen wol anstee, vnd dez han ich mich gesezzet läuterleichen vnd duerna^echtichleichen an sein trewe vnd di er mir auch dar vmb hat gegeben, vnd daz disev sache vnd diser gewerft meinem Oeheim Hadmaren von Waldekk dem vorgenanten fu^erbaz also stet vnd vnzebrochen beleib, gib ich disen prief zu einem verchunde versigelten mit meinem Insiegel vnd mit den zeugen, di man hie benennet. Daz ist Her Syefrid der vruem Esel, Her Reinprecht von Poelnhaeim, Her Ortolf von Marspach, Her Chalhach von valchenstain, Her Oertneid von Tannberch, Her Chvenrat von valchenstain, Her wernher von Poelnhaeim vnd ander piderb leut, di da pei warden. der prief ist gegeben datz wesen, do von Christes gepuerd wa^ern Tausent jar, drev hvndert jar dar nach in dem aein vnd tzwaintgisten Jar an sand Nyclaes tag.

Source Fulltext: OÖUB 5 (Wien 1868), S. 309-310, Nr. 319