ICh Nichlas hern Arnoldes svn des priesters von Medlich vnd ich Alhayt sein havsvrowe wir veriehen vnd tun chvnt allen den, die disen prief lesent oder horent lesen, di nv lebent vnd hernach chvnftich sint, Daz wir mit vnser erben gutem willen vnd gunst, mit verdachtem mvte vnd mit gesamter hant zv der zeit, do wir ez wol getun mochten, Vnd mit vnsers pvrchherren hant hern Siboten von Mitterndorf vnd seiner havsvrowen vron Preygiden verchavft haben vnser wisen, die da leit ze Aychawe jn den Luhssen ze naehist Herweigis wisen, der Sechs tagwerches sint vnd dient alle jar zwelif wienner phenninge ze rechten purchrechte. Die selben Wisen haben wir verchavft vnd geben mit allem dem Nvtz vnd recht, als wir sie jn purchrechtes gewer her pracht haben, vmb zway vnd zwentzzich phvnt wienner phenninge, der wir recht vnd redlichen gewert sein, dem erbern manne hern Vlrichen von pvchs vnd seiner havsvrowen vron Alhayden vnd allen irn erben ledichlichen vnd vreilichen ze haben vnd allen irn frvmen da mit ze schaffen, verchavffen, versetzzen vnd geben, swem si wellen an allen irresal. vnd dar vber zv ayner pezzern sicherhayt so setzzen wir vns Ich Nichlas hern Arnoldes svn des priesters von Medlich vnd ich Alhait sein havsvrowe vnd ich Sibot von Mitterndorf vnd ich Preygide sein havsvrowe vnverschaydenlichen hern Vlrichen von pvchs vnd seiner havsvrowen vron Alhayden vnd allen irn erben vber die vorgenanten Wisen ze rechtem scherm fur alle Ansprache, als purchrechtes recht ist vnd des Landes recht ze Osterriche; vnd swaz hern Vlrichen von puchs vnd seiner havsvrowen vron Alhayden vnd irn erben mit rechte abe get An der vorgenanten Wisen oder swaz sie sein schaden nement, daz si mit irn triwen gesagen mvgen, den svln wir jn mit gutem willen allen abe legen vnd suln avch sie den selben schaden mit samt dem havptgute haben auf vns vnd avf vnserm gute, daz wir haben jn dem Lande ze Osterreiche, wir sein lebentich oder tot; vnd geben jn dar vber disen prief zv Aynem sichtigen vrchunde vnd zv Aynem waren gezevge vnd zv Ayner ewigen vestnvnge diser sache versigilten mit vnsern Insigiln; vnd sint avch des gezevg her Otte der Wulfleinstorfer zv den Zeiten purger mayster ze Wienne, Levpolt der poltz, der wenige Levpolt vnd Ander frvme levte genvch. Diser prief ist geben ze Wienne, do von Christes gebvrt waren ergangen Drevzehen Hundert Jar jn dem Ayn vnd zwentzzigistem Jare, dar nach an der Aynlif tavsent Mayde tage.

Source Fulltext: OÖUB 5 (Wien 1868), S. 302-303, Nr. 312