Wir Graf Perchtolt von Neiffen vnd vnser libev havsvrawe frawe Elspet vnd vnser erben verjehen vnd Tv^en chvnt mit disem brief allen den, di in an sehent oder Ho^erent lesen, swaz vns von vnserm liebn bruder Graf fridreichen von Tru^ehenting, der nv laider verschaiden ist, dem got genad, vnd von vnserm lieben vatern Graf vlrichen von Tru^ehenting vnd von allen seinen vor fodern, di von Tru^ehenting sint genant, an gevellet oder lazzen habent oder noch an gevallen sol oder erben, ez sein purig, vest, laeut oder gu°t, aigen oder lehen, swi ez genant ist, besuecht oder vnbesuecht, Daz wir daz gar vnd gsentzleichen mit Graf Hainrich von Schavnberch vnd mit vnserr lieben swester frawe Anna seiner Havsvrawen vnd mit allen ieren erben Erben vnd taillen schvllen an alles gevaer in geleicher weiz alles, daz vor verschriben ist Ainem als vil als dem andern an als gevaer. wir vergehen auch, daz vns Graf Heinreich von Schavnberch vnd vnser liebev swester frawe Anna daz vor verschriben gut enpholhen habent, daz si angevallen ist vnd auch noch an gevallen sol, als vor verschriben ist, daz si vns daz enpholhen habent hincz vnsern trewn Also mit der beschaidenhait, ob daz waer, swann si ires tailes niht enperen si oder ier erben, daz wir dan mit in tailen schu^ellen vnd schvllen in daz auch niht lenger verziehen in geleicher weiz, daz Ainem Als vil schol gevallen Als dem andern an Als ge vaer alles, daz vor verschriben ist. Daz in daz also staet vnd vnzebrochen beleib, geb wir in disen offenbrief versigelt mit vnserr baider Insigel. Daz ist gescheehen, do man zalt von Christes gepu^ert Dreuzehen Hvndert jar vnd dar nach in dem vier vndzwainzigistem jar des phintztages vor dem Palmtag.

Source Fulltext: OÖUB 5 (Wien 1868), S. 382-383, Nr. 387