ICH Prvder wilhalm zv den zeiten Prior ze Paden vnd die Samnvnge des selben Chlosters wir veriehen vnd tvn chvnt allen den, die disen Prief lesent oder horent lesen, Die nv lebent vnd her nach chvnftich sint, Daz wir mit gvtem willen vnd mit gemainem Rat zv der zeit, do wir iz wol getvn mochten, verchavft haben vnsers rechten aigens ainen weingarten, der da leit ze Paden an dem Chalten Perig pei der Rinne mit allem dem nvtz vnd recht, als wir jn jn Aigens gewer her pracht haben, vmb Drev vnd zwaintzich phvnt Wienner phenning, der wir recht vnd redleichen gewert sein, Dem erbern herren hern Otten dem Tversen von Ravchenek vnd seiner Havsvrowen vron Petersen vnd allen irn erben fvrbaz ledichleichen vnd vreyleichen ze haben vnd allen irn frvmen da mit zeschaffen, verchavffen, versetzen vnd geben, swem si wellen an allen irresal . vnd dar vber dvreh Pezzer sicherhait so setzzen wir vns jch prvder wilhalm zv den zeiten Prior ze Paden vnd die Samnvnge gemain des selben Chlosters vber den egenanten weingarten. Dem erbern Herren hern Otten dem Tversen von Ravchenek vnd seiner havsvrowen vron Petersen vnd allen irn erben ze rechtem scherm fvr alle ansprach, als Aigens recht ist vnd des landes recht jn Osterreich vnd geben jn dar vber disen Prief zv ainem offen vrchvnde vnd zv ainem waren gezevg diser sache versigilten ich prvder wilhalm zv den Zeiten Prior ze Paden mit meinem Insigil vnd wir die Samnvnge gemain des selben Chlosters versigilten mit vnserm Insigil. Diser Prief ist geben ze Wienne, do von Christes gebvrt waren ergangen Drevtzehen Hvndert jar jn dem vier vnd zwaintzgisten jare, dar nach an sand vrbans tage.

Source Fulltext: OÖUB 5 (Wien 1868), S. 395-396, Nr. 398