Ich Peter der Alt von Lobenstain vnd ich Peter sein Svn wier vergechen vnd tu^en chv^ent allen den, di disen brief sehent lesent oder hornt lesen, Daz wier recht vnd redleich gesaczt haben alle vnser weingarten, di wier haben ze arnstorf vnd den weingarten auf dem Seczperig vrown Ofmein hern Gvndachers Tochter von Storchenberch meines vater hausvrown fu^er zwai hvndert phvnt wyenner phenning für ir recht heyrat gu^et Also weschaidenlich, wan daz ist, daz er pej ir gesleft, so sehol er di vor genant vron Offmein sein hausurowen auz richten vnd geweltig machen mit herren hant inr Jars vrist der vor genant zwain hvndert phvnt phenning genzleich vnd gar an allen chrieg, vnd zv einer peczern sicherhait diser sache secz wier zv samt vns ze purgel vnuerschaidenleich Vlreichen den Prueschinchen also weschaidenleich, ob er di oft genant vron Offmein sein hausvrowen irs rechten heyrat guetes nicht verriebt inr Jars vrist, als vor verschriben ist, So schol si vnser ain, welichen si dan wil, vodern ze laisten ze Lincz in ein erber gasthaus vnd schol der in ligen, als inligens recht ist, vnd nicht auz chomen, iz werd dan di Oft genant vrowe Offmej gar vnd gancz auz gericht irr zwair hundert phvnt phenning, als vor verschriben ist. wer aver daz, daz ir an dem ê genant sacze icht ab gienge, da von si ir zwaier hundert phunt nicht enuoln mocht gewert wern, so schulle wier ir daz vbrig erstatten vnd eruoln von anderr vnserr hab, di wier haben in dem Lant vnd schol daz geschechen nach hern Albers rat von volchestorf oder von einem seinem genozzen, ob er nicht enwer, des got nicht engeb, vnd daz daz ir also stet weleib, geb wier ir disen brief versigelt mit vnsern Insigeln. Der brief ist geben nach Christes gepu^erd vber Drevzehen hundert Jar, in dem fvmf vnd zwainczgstem Jar dar nach des Eritags vor dem vanchsschang.

Source Fulltext: OÖUB 5 (Wien 1868), S. 417-418, Nr. 419