Ich Rapot von willdek vnd ich Chadolt der altenwurger vnd wier Hertneid vnd Ott hern Otten sun von willdek vnd ich Dyetreich vnd mein brueder her Stephan von Hohenwerch vnd vnser aller erben, dev nu lebent oder her noch chumftich werdent, Veriehen vnd tuen chunt allen den, de disen brief lesent oder horent, de nu lebent vnd noch werdent, Daz wier mit vnser allen gueten willen vnd zv der zeit, do wier iz wol getuen mohten, haben sollen ewigen einen steten Gotes dienst Dacz Hohenwerch in dem Marcht vnd hin fuer ewichleich beleiwen zv einer steten Pharre von fuert vncz in das lueg, vns ze hail vnd vnser vodern sel ze hilf Also, daz dev pharre dacz sand Gylgen. di wier mit einander ze leichen haben, dehainen schaden dor an niht nein, iz sei an czehent oder an widem gult An alain an dem tegleichen nuez, den man fur dienen sol mit zwain phunten alle iar all quotemper ein halbes phunt wienner phenning vnd sol auch swer pharrer dacz sand Gylgen ist, di Chirichen leichen dacz sand jacob vnd ander niemen, vnd daz dev pharre vnd der Gotes dienst in dem Marcht ze Hohenwerch stet vnd vnzebrochen beleib fuerbaz von vns vnd von allen vnsern erben, Dor vber so geb wier disen brief versigelt mit vnser aller insigel, jch Rapot von willdek vnd ich Chadolt der altenwurger vnd ich Hertneid vnd mein brueder Ott hern Otten svn von willdek vnd ich Dyetreich von Hohenwerch vnd mein brueder her Stephan. Der brief ist geben, do von Christus gebuerd woren ergangen dreuczehen hundert iar vnd dor noch in dem fumf vnd zwainczgisten iar an vaser vrovn tag zv der buerd.

Source Fulltext: OÖUB 5 (Wien 1868), S. 436, Nr. 437