Wir Dietreich vnd Stephan die Hohenberger veriehen vnd tv^en chvnt allen den, die disen brief sehent vnd horent lesen, Daz vnser vater her Stephan, dem got genade, bei seinem Lebentigem leib alle jar mer danne dreizzich jar hat gegeben dvrich seiner sel hail willen ain wandelchertzen zv dem Gotshovs datz sant johans ze Traisem. Nv hab wier mit vnsrer besten vrevnt rat vnd gvnst vnd avch mit vnserr erbern Mv^eter vron Chvnigvnden gv^etem willen zv der zeit, do wier iz wol getv^en mohten, dev selbe andaht vnsers vorgenanten vater hern Stephan von Hohenberch dvrich seiner vnd ander vnserr vodern sel hail willen bestetigt vnd geêwigt vnd haben gegeben zv dem vorgenanten Gotshovs vnsers rehten aigens zwen vnd drezzich phenninge geltes, die man dient an sant Polten tag von ainer wis, div da gelegen ist datz Rorbach, also beschaidenlich, swer die vorgenanten wis jnne hat, der schol alle jar an sant Polten tag dem vorgenanten Gotshovs fv^er die egenanten zwen vnd dreizzich phenning geben drev phvnt wachs vnd fv^er zwen phenning tahtes genvch zv einer erbern wandelchertzen, mit der man taeglich loben schol die wandlvnge vnsers herren Gotes Jesu christi. Daz die sache vnd daz selgerêt stet vnd vnzebrochen beleib, dor vber geb wier Dietreich vnd Stephan die vorgenanten Hohenberger zv einer ewigen sicherhait diser sache disen brief versigelt mit vnsern jnsigeln vnd mit des erbern Prelates jnsigel apt Otachers von lylinueld, den wier darvmb gebeten haben, der avch diser sache gezevg ist mit seinem jnsigel. Diser sache sint gezevg Marchart vnd Stephan vnd Ott die Neunwalder, volchwein vnd Ott die Po^emer, vlreich der gewel vnd ander piderber levt genvch, den disev sache wol chvnt ist. Diser brief ist gegeben, do von Christes gepv^ert ergangen warn drevzehenhvndert jar, dar nach in dem fvmf vnd zwainzigisten jar an sant Margareten tag.

Source Fulltext: OÖUB 5 (Wien 1868), S. 434-435, Nr. 435