Ich Hainreich von Sumerawe Vergih mit disem prief und tv^en chunt allen den, die in sehent oder horent lesen, Daz ich mit wol bedahtem mvet vnd guetem willen zv der zeit, do ich daz wol getvn maht, gegeben han ledichleich vnd gentzlich meines rehten aigens vier phunt wienner pheming (sic) geltes, daz mein rehtes chaufaigen gewesen ist, di gelegen sind ze Rust vnd ze Merching, die ich gechauffet han von meinem vetern hern Rv^egern von Sumeraw hern Chvnrats svn, seiner hausvrawen ver Margreten vnd ir paider erben vmb mein aigenhaft guet, Hainreichen dem Sumerawer von Hahenberch vnd seinen erben Also, daz der selb Hainreich die vorbenanten vier phunt geltes mit sampt seinen erben vnd alles daz, daz dor zue geho^eret, wie daz genant ist an allen dingen, hinfv^erwerd ewichleich schullen haben mit allem reht v^end nutze, als ich die enher gehabt han in rehter aigens gwêr, allen iren frumen do mit ze schaffen als mit anderm irem aigen, mit versetzen oder verchauffen oder wem si die selben gult gebent, di schullen die selben gv^elt ewichleich auch haben gentzleich mit dem selben reht an allev irrung. Vnd ich erstgenanter Hainreich von Somerawe lobe dem selben Hainreichen dem svmerawer vnd seinen erben mit meinen trewen, die vorbeschriben gu^elt von reht ze schermen fu°r allev ansprach, als reht ist in dem Lande ze Osterreich, vnd waz in dor an ab gieng, daz schullen si haben auf allem dem guet, daz ich han in dem Lande ze Osterreich. Vnd daz die sache, als beschriben ist, ewichleich stêt vnd vnzerbrochen beleibe, gibe ich egenanter Hainreich von Somerawe dem oftgenanten Hainreichen dem Somerawer von Hahenberch vnd seinen erben disen prief zv ainem vesten gezeugen diser sache versigelten mit meinem jnsigel. Der prief ist gegeben, da von Christ geburd ergangen waren Tausent iar, Drev hundert jar, dar nah in dem fvnf vnd zwainzigisten jar An Sand Cholmannes Tag.

Source Fulltext: OÖUB 5 (Wien 1868), S. 438, Nr. 439