Wir Graf Wilhalm von Schounberch vnd wir Groefin Elspet sein wirtin veriehen an disem prief vnd tu^en chunt allen, den er gelesn wirt, daz wir loben vnd gelobt habn dem edeln manne hern petern von Liebenberch vnd seinner wirtin vrawen Margareten vnd allen iren erben vm die vest Truxsen, die wir in verchouft habn vm vier hundert march aglayer von nu sand Jorgen tag, der nu schierist chumftig ist, vber zway jar, ob die vo^er genante vest ver viel vnd wir sei nicht her wider chaufen ouf den vo^ergenanten tach, vo^er acht tag oder hin nach acht tage, so geben wir ouf vnserm lieben herren von Gurch mit disem offen prief die vo^er genant vest vnd waz dar zu^e geho^ert, leut vnd gu^et vnd wie ez gehaizzen ist, also, daz er die vo^er genant vest leihe vnd sol vnd muge dem vo^er genanten hern Petern von Liebenberch vnd seiner wirtin vnd allen iren erben mit vnsern pet vnd guten willen, als ez wol pillich ist, wan die vo^er genant vest vnser rechte mo^ergengabn ist von vnsern saeligen wirt Graf Herman von Heunburch, wan wir ez wol getu^en mugn vor allen vnsern erben vnd vns ain pischolf bestaetiget haet mit seinnen priefen. vnd daz in daz von vns stete vnd vnuerbrochen behalten werde, dar vber gebn wir im disen offen prief ze einner vrchunde der warhait versigelt mit vnsern hangenten jnsigel. Dez sint gezeuge der edel her Chunrat von Auuenstain, her wluinch vnd her friderich von Rechperch, her Ott von himmelberch, her friderich der smucher vnd der Chumberger vnd ander erber leute. Der prief ist gebn ze Pleyburch, do man zalte von Christes geburt tousent vnd dro hundert jar, in dem fumf vnd zwainzigisten jare, des samztags nach sand wlreichs tag.

Source Fulltext: OÖUB 5 (Wien 1868), S. 431, Nr. 432