Wir Graf Wilhalm von Schoumberch vnd wir Grêfinne Elspet sein Wirtinne veriehen an disem offen briefe vnd tu^en chunt allen den, die in sehent, lesent oder horent lesn, da/, wir mit verdachtem muote vnd willichleichen verchauft haben vnser vest Truchsen, dev vnser morgengab ist von vnserm seligem wierte Graf Herman von Heunnburch, dem got gnade, vnd swaz dar zu° geho^ert leut vnd gu°t, dem edlem manne hern Petern von Liebnberch vnd seiner wirtinn vrawen Margreten vnd allen iren erben sunen vnd tochtern vmb vier hundert march aglayer von nu sand Jo^ergen tag, der nu schierist churnt, vber zwai iar, Doch also vnd mit sogetanen gelubden vnd punden, wer, daz wir die vorgenanten vest vnd swaz der zuo geho^ert, her wider chouffen mit vnserm aigenleichen gu°t an allez geuerde, vnd svlen die vorgenanten vest Truchsen vmb daz vorgenante gu°t nindert anderswar versetzen noch verchummern, da mit wir sei losen wolden vmb die vier hundert march aglayer, ez sei hiwer oder hin ze iar oder in dem dritten iare ie des iares vor sand Jorgen tag acht tag oder hin nach acht tag, so sol vns der vorgenante her Peter von Liebenberch vnd sein housfrowe vnd alle ir erben die vorgenanten vest vnd swaz dar zu° geho^ert, her wider ze chauffen gebn vmb die vorgenanten vier hundert march aglayer an allen chrieg vnd an alle taiding auf die vorgenanten vest iaerichleich zwainzich march aglayer ze purchhut vnd ze pezzerung des hauses zwo^e vnd dreizzich march aglayer, die sulen wir im ouch gebn, ob wir die fest her wider chauffen, so sel wir des gu^ets gepunten ze gebn mit anderm gu^et als vor geschriben stet. Wir Graf Wilhalm von Schoumberch vnd vnser housfrowe Graefin Elspet loben ouch hern Petern von Liebnberch vnd seiner wirtinnen vnd allen iren erben, daz haus ze machen vnd ouf ze geben von dem Lehn herren, der iz ze reht leihet, an allez geuerde pei vnsern triwen, vnd daz deu vorgenanten gelubde hern petern von Liebmberch vnd seiner housfrowen vrowen margreten vnd iren erben sunen vnd tochtern von vns stete vnd vnuerbrochen behalten werde, dar vber gebn wir in disen offen brief mit vnser paider anhangendem jnsigeln versigelt. Des sint geziug der edel her Chu°nrad von Auuenstein, hur wulfing vnd her friderich von Rechperch vnd her Ott von Himmelberch, her friderich der smucher, Otte der Chumberger, vnser Schreiber Chunrad, vnd ander erber Liute. Der prief ist gebn ze Pleiburch, do man zalte von Christes geburte tousent vnd drew hundert iar, in den fu^emf vnd zwainzigistem jare des samztags nach sand vlreichs tag.

Source Fulltext: OÖUB 5 (Wien 1868), S. 433-434, Nr. 434