Ich Herman von Hyplestorf vnd mein Hausvrowe vro Katherey vnd alle vnser erben vnd Ich Hertweich hern Otten sun von dem wasen vnd meinev geswistereit Hainreich, Purchart vnd Katherey veriehen an disem prief offenwar vnd tun chunt allen den, die in ansehent Oder horent lesen, die nv lebent Oder hernach chunftig werdent, Daz wir mit gutleichem willen vnd noch vnsrer vreunt rat Dem erbern mann Hainreichn dem Hocholtzpechen vnd seiner Hausvrowen vro Kathereyn vnd allen seinen erben haben ze chauffen gegeben den Hof datz Scho^enenprunn in Sytansteter pfarr vmb vier vnd viertzich pfunt pfening wienner munizz besu^echt vnd vnbesucht, ze holtz vnd ze veld vnd mit alle dem recht, daz darzv^e geho^ert. Wir schullen ouch des vorgenanten Hofs ze Scho^enenprunn ir gewer sein ze hof vnd ze taiding oder swo in des durft geschiecht. Wer auer daz, daz dem vorgenanten Hainreichen dem Hacholtzpechn vnd seinen erben dhain mue oder dhain chost auf denselben hof gieng, Die schol ich Herman von Hyplestorf vnd ich Hertweich hern Otten svn von dem wasen vnd alle die, die oben geschriben stent, in ablegen vnd schullen iz haben auf alle dem, vnd wir haben in dem land. Daz in disev red staet vnd vnzebrochn beleib, geb wir in disen brief ze einem ewigem vrchund. Mit disen Anhangundn insigeln: Hermans von Hyplestorf, Hertweiches Hern Otten sun von dem wasen, Hern Rugern von Zaucha, Wernhartes von Schafferveld, Purchartes hinder dem Holtz; Vnd sint des gezeug Her Alram von Reikkerstorf; Her walther von meireinstorf, Marichart der Luechsnich, Ludweich vnd Pilgreim paid tyeminger, Herman eysenhof vnd sein prvder Chunrat vnd ander erber leut genu^ech. Ditz ist geschehen do von Christi gepurt waren ergangen Tausent iar Drev hundert iar, Darnach in dem Sechsvndzwaintzigistem iar An Sand Jacobs Tag.

Source Fulltext: OÖUB 5 (Wien 1868), S. 455, Nr. 457