Ich Chunrat der Celler vergich vnd tvn Chvnt allen den, di disen Prief lesent, Horent oder sehent, Daz ich mit verdachtem mv^et, mit gu^etem willn vnd gvnst meiner Housvrovn vron Elzbetten, aller meiner Chind, Su^ene vnd Tho^echter vnd aller meiner Erben Den Edeln meinen lieben vnd gnaedigen Herren Graf Chunraten, Graf Heinrichn von Schovnberg vnd allen iren vettern vnd Brudern vnd allen irn Erben mein rechtes Choufaigen Das Hou^es ze Rydow vnd allez, daz darzv gehoret versu^echt vnd vnversucht vreilich vnd ledichlich oufgegeben han, dez sich alle meine Chint svn vnd Tho^echter vnd alle mein Erben verzigen habent mit fu^erzicht, di sitleich vnd gewoenleich ist nach dez Landez Recht ob der Ens Also, daz si vnd ir Erben mir, meiner obgenanten Housvrovn vron Elzbetten vnd vnsern Chinden Svnn vnd Tho^echtern Daz vorgenante Hous ze Ryedow vnd allez, daz darzv gehoret, ze rechtem lehen verlihen habent vnd all vnsern Erben Svnn vnd Tho^echtern Ebichlich leihen sullen. vnd Daz in vnd alln iren Erben von mir, von meiner Housvroven vnd von allen meinem Erben daz also staet vnd vnzerbrochen beleib, darvber ze einem vrchvnd gib ich in disen Brief versigelten mit meinem jnsigel vnd mit meiner lieben vrevnt Hern Dyetmars von Lerbu^ehel, hern Rudolfes dez Schifers, hern Albers von Portzhaym vnd Othakers dez Furter jnsigeln besigelten, Di der sach taydinger vnd Schiedleut gevvezzn sint vmb schuld, da ich gen meinen vorgenanten Herren von Schovnberg ingevallen waz. Der brief ist geben ze Schovnberg, Da man zalt von Christes geburt Drevtzehen Hvndert jar vnd darnach in dem Sechs vnd zwaintzigisten jar An sand Peters vnd an sand Pauls tag.

Source Fulltext: OÖUB 5 (Wien 1868), S. 454, Nr. 456