ICh Chunegund von Lessperch vnd ich Ru^eprecht ier Sun vnd all venser erben veriehen offenbar an disem prief vnd tu^en chund allen den, die in an sehnt, ho^ernt oder Lesent, daz wier vnuerschaidenlichen gelten schullen vnserm lieben Swager herm Hansen von Jungling vnd seiner Hausvrowen vnd allen ieren Erben sechs hundert gu^eter Guldein florin, di die wag habent, Vnd hab wier in dar vmb mit gesamter hant vnd mit rat vnd mit gunst vnser pesten vreunt czu der czeit, vnd wier ez wol getuen mochten, czu einem rechtem phant versaczt vnsern Turen, der gelegen ist an dem Pliesch, manschaft mit Leuten vnd mit gu^et allez, daz der Lessperger da selbe hat gehabt, chirsacz gestift vnd vngestift, gepaun vnd vngepaun, holtz, akcher, wismat, gesu^egu^echt (sic) vud vngesu^echt, wie daz genant sey, alz wir vnd vnser vo^edern daz gu^et von alter in nuez vnd in gewer her pracht vnd inne gehabt haben, wie daz genant ist, also lob wier in daz egenant gu^et czu scherm vnd czu verantburten vo^er aller ansprach nach Landes recht. Tet wir dez nicht, swelhen schaden seu dez nempt, den ier ainz pei seinen trewn gesagen mag an ayd vnd an alle ander pewerunge, den schullen wier in ablegen an alle chlag, daz lob wier in pei vnsern trewn an aydez stat, vnd schullen seu daz haben auf vns vnd auf alle deu, vnd wier haben vnuerschaidenleich von ainem hincz dem andrem. Ob wier vnz dar an indert vergezzen vnd des nicht enteten, so sol seu vnsers Landes herre oder wer an seiner stat ist, genczleich wern Hawptgu°tes vnd dez Schadens von vnserm gut mit vnserm gu^etlichen willen an chlag vnd alle taydinge. vnd ist der saez geschehen also peschaidenleich: Wann ich Chu^enegunt von Lessperg oder ich Ru^eprecht oder vnser erben hern Hansen von iungling oder sein Hausvrown oder ier paider erben ermanenn mit sechs hundert gu^eten guldein florinn, die di wag habent, vnd wier seu der genczleich gewert haben vor sand Jorgen tag, so ist vns vnser gu^et mit samt dem nuez genczleich ledig; geschech awer di lo^esung nach sand Jorgen tag, So ist in der nucz dez selben iarez von dem gu^et genczleich veruallen. Vnd wer vns ermant mit dem prief, dem schull wier der sechs hundert guldein vnd aller der gelub, die hie vo^er gescriben stent, alz genczleich gepunten sein czu Laisten alz hern Hansen von iungling selb. Vnd daz in daz stet vnd vnczebrochen von vns peleib, dar vber geb wier ich Chu^enegund von Lessperg vnd ich Ru^eprecht ier sun disen prief versigelten mit vnsern paiden anhangunden in sigeln czu ainem vrchund der warhait. Der prief ist gewen nach Christez geburt vber drewzehen Hundert iar, dar nach in dem siben vnd Czwainczigisten iar, acht tag vo^er sand Jergen tag.

Source Fulltext: OÖUB 5 (Wien 1868), S. 473-474, Nr. 476