Wu^er Grafe Chunrat von Schouenberch Veriechen offenbar an disem brief, daz vns vnser lieber Herr Pischoff Nichla von Regenspurch sein Leut vnd sein gut ze Hargensee, die emaln in seinem Scherm hete der Erber man herr dietrich von Pillichsdorf Marschalch in osterreich, dem gott gnade, ouf vnser treu enpholhen hat, das wir in die gutlichen vnd fridleichen behueten vnd beschermen schullen mit vnsern treuen, als wir allerpeste chunen vnd mûgen mit ganzem fleizze, die weil vnd er vns des gan. Swenne auch daz ist oder von swelhen sachen daz kheme, daz wir vnserm vorgenanten Herrn den Pischolf oder seinen nachkomen nicht enfügten, so mugen seu fürbaz dieselben leut vnd gut enphelchen vnd ze ainem schermer geben, sweme sy wellent, vnd daz schullen wir auch nicht fu^er u^ebel haben vnd schol auch sein der Pischoff noch sein Gotshauss noch die leute ze Hargensee noch jr gut gegen vns an nichte engelten noch vnsrer fürderunge darumb enporen, vnd haben auch wir noch vnser Erben darauf fürbaz nicht mehr zesprechen. Vnd darüber ze ainem offen vrchunde geben wir disen brief versiglten mit vnserm jnsigel. diser brief ist geben ze Wienne nach Christes gebuert dreyzehenhundert jar, darnach in dem Siben vnd zwainzigisten jare an Sand Philipps vnd sand Jacobs tage zwaier zwelfpoten.

Source Fulltext: OÖUB 5 (Wien 1868), S. 474-475, Nr. 477