Den erbern herren hern heinreich vnd hern Reinprechten vnd hern fridreihen den pru^edem aln drin von walsse vergieh ich eber von eybenstain vnd ich gotfrid von plezperig an disem prief allen den, di in sehent oder horent lesen, di nu lebent oder her nach chumftig sind, daz wier der vorgenanten herren scherm sein des hofes, den sev gechauffet habent von dem geveller vmb zwaiundreizich phunt wienner phenning, der da leid datz savkkarn, als landes recht ist vnd gewonhait in Osterreich, fuer alle ansprach; wer aver daz, daz die vorgenanten herren von walsse an dem scherm, den wier in gelobt haben, chainen schaden nemen, daz schullen sev haben auf vns vnd auf allem dem vnd wier haben in dem land ze osterreich. Daz disev red stet sei vnd zerprochen (sic) beleib, dar vbrr gib ich eber von eybenstain vnd ich gotfrid von plezperig disen prief versigelt mit vnser paider in sigel zeiner sichtigen vrchunde vnd zu einer offen gewizzen diser sache. Der prief ist kewen, do von christes gepu^erd warn er gangen tavsent iar, drev hundert iar dar nach in dem siben vnd zwainzkkistem iar an sand merteins tag.

Source Fulltext: OÖUB 5 (Wien 1868), S. 497, Nr. 499