Ich Rueger von Storchenberch vergich vnd tuen chvnt allen den, di diesen brief sehent oder lesen horent, Daz ich geben han dem Erbern hern hern Eberharten von Walsse zu den zeiten Lant Richter ob der Ens mein vogtai vnd mein vogtrecht, daz ich gehabt han auf dem gu°t, daz da geho^ert gen sant Nycla ze pazzaw vnd daz lehen ist von meinem hern Pischolf Albrechten von pazzaw, vnd des selben gu^etes, des ist an sant jorgen tag zwelif schilling pfenning geltes vnd an sant Michels tag zwelif schilling pfenning geltes vnd vier vnd dreizzig metzen habern vnd zehen vnd fumf schilling ches, daz immer der chaes ains phenninge werd sei, vnd zwainzig hvener vnd ein halbz phunt pfenning fu^er di fu^er, vnd schol auch all jar haben dreu vogtaiding auf der selben vogtai vnd schol man in mit dreizzig pferisten verchosten vnd daz gib ich v^em allez sant, versuechtez vnd vnuersuechtz, zeholtz vnd zeueld mit nutz vnd mit gewer in allem dem recht, als ich ez her pracht han in lehens gewer, vmb hvndert phunt vnd vmb zehen phunt pfenning alter wienner, der er mich gantz vnd gar verricht vnd gewert hat. jch schol auch des selben gu^etes sein gewer vnd sein scherm sein für all mein Erben vnd fu^er all ansprach, wo iem des not geschieht vnd schol iem auch daz selb gu^et auz richtig machen an aller der stat vnd ich zerecht sol, also des landes recht ist ze osterreich, vnd daz gelub ich iem mit meinen trewen vnd swo ich daz gelub nicht vol fu^ert gantz vnd gar, so sol er ez haben auf mier vnd auf aller meiner hab, di jch hant in dem lant ze osterreich oder swo ich sei han. vnd daz di red stet vnd vnuerchert beleib, dor vber gib ich iem disen offen brief versygelten mit meinen jnsygel. Der brief ist geben ze lintz, do von Christes geburd ergangen waren drevtzehen hvndert iar, dor nach in dem syben vnd zwainzigistem jar an sant katrein tag.

Source Fulltext: OÖUB 5 (Wien 1868), S. 499-500, Nr. 501