Wir Graff Hainreich von lenberch vergechen vnd tuen chvnt allen den, di disen brief lesent oder horent lesen, di nv lebent oder hernach Chvmftich wernt, Daz wir ze rechtem lehen Geliehen haben Chvenrat von Tannberch vnd Ortneid von tannberch vnd ir paider Eriben, swaz wir aigener leut haben zwischen Griezpach vnd wessenberch vnd haslach, Oder wo wir Si in dem land hie niden haben, di vns Enpharn seint vnd di vnser recht aigen leut Gewesen sint vnd noch sint, iz sel weip Oder man, vnd all ir Erben, di da von chvement oder noch chvmen schuellen. swer si dar vemb fuerbaz an Sprech Oder irricht, des schull wir ir rehter herr vnd ir gewer sein an all der Stat, da in des not Geschiecht. Daz in di red stet vnd vntzebrochen beleib, geb wir in diesen brief versigelten mit vnserm hangunden insigel. Des sint zeug her hadmar von waldech, her hainreich von valchenstain, Haug von marspach, Fridreich von Marspach, Ulreich von Haichenpach, Ruger sein Pruder, Her wernhart von inn vnd ander piderber levt Genveg. Der brief ist Geben, do von Christes Gepuerd vergangen waren driutzehen Hvndert iar, darnach in dem nivn vnd zwaintzigest iar an vnser vrowen tag der lichtmes.

Source Fulltext: OÖUB 5 (Wien 1868), S. 534, Nr. 533