Wir Albrecht vnd alram di Grauen von Hals fergehen an disem prief vnd tu^en allen den chunt, di in sehent oder horent lesen, daz wir vnd vnser erben gelten schulen dem erbern manne Eberharten von waldse ze der zeit Lantrichter ob der Ens vnd seinen erben hundert march lo^etiges silbers wienner gewichtes oder ie zwen vnd sybenczch grozer peheimischer phenninge fu^er ein iglich march, vnd schulen in der richten vnd weren auf sand Michelstag, der schirist chumt. vnd zu pezzer sicherhait hab wir im vnd seinen erben ze samt vns vnferscheidenlich ze purgen gesatzt Albrechten von tannberch, Dietreichen den vsel, Chunraden den furter, Dietreichen vnsern Richter von Osterhouen also bescheidenliche, ob wir den forgenanten eberharten von waldse vnd sein erben nicht entrichten der foruerschriben hundert march zu dem forgenanten tage, so schulen di forgenanten pu^ergen ze pazzawe in faren in ein erber gasthaus ie der man mit eim pherd vnd schulen inne ligen, als inneligens recht ist vnd nimmer auz chumen, ez werd Eberhart von waldse vnd sein erben genczlich vnd gar gewert haupgutes vnd schaden an alle gefer. wir loben auch mer, ob eberhart von waldse . ze der zeit daz haus Newenburch nicht inne het, so schulen di forgenanten purgen leisten ze Lintz in di stat mit alle dem recht, als for geschriben stet, vnd ich Albrecht von Tanneberch, Dietreich der vsel, Chunrat der furter, Dietreich der Richter von Osterhouen fergehen auch an disem prief, daz wir alle di gelub, da wir vns ze ferbunten haben mit vnsern jnsigelen für vnser herren von Hals gein hern Eberharten von waldse vnd seinen erben gern stet wellen haben vnd schol daz haben auf vns vnd auf aller vnser hab vnd auch also mit auzgenumener red, ob vns no^etige sache irret, daz wir nicht geleisten noch inne geligen mochten, so schol ie der man einen erbern chnecht mit eim pherd in legen, der an seiner stat leist ze gleicher weis, als er selbe, daz diseu red also stet vnd vncerbrochen pleibe, daru^eber geb wir im disen prief fersigelt mit vnsern Insiglen vnd mit der forgenanten porgen Insigelen. Der prief ist geben ze wienne nach Christes gebu^ert dreucehen hundert iˆar in dem neun vnd zweincigisten iar an dem palm tage.

Source Fulltext: OÖUB 5 (Wien 1868), S. 539-540, Nr. 540