Wir Pruder Jacob Apt ze dem Heyligen Chreutz vnd di samnung gemain veriehen offenleich mit disem prief, Daz vns der Edel vnd der Erber herre her Otte der Tuers von Rauheneke mit verdachtem muet vnd mit guetem rat seiner vrevnt vnd mit verhanchnuz seines suns hern Jasen (sic) vnd aller seiner Tochter ze der zeit, vnd er ez wol getuen macht, gegeben hat Einen weingarten, der haizzet der Chrump vnd ist gelegen ze Paden an dem perig vor der chirichen ze der pharre, durich got vnd durich seiner havsfrawen vrowen Petersen vnd ir paiden vodern sel willen seines rechten chauf guetes mit allem dem recht, vnd er in mit sant seiner vor genanten havsfrawen inne gehabt hat vnd in rechtes Purchrechtes gewer her vntz auf disen tag pracht hat, wan sev in indem selben fuersatz chauften, daz sev in vnd iren vodern ein ewiges sel geret vnd einen Jar tag da von stiften wolten, ledichleichen ze haben an alle ansprach, ze versetzen vnd verchaufen vnd allen vnsern frum damit ze schaffen Mit also auz genomner red, daz wir ewichleichen alle jar an sand Andres tag nach seinem tot seinen jartag vnd seines suns Jansen nach seinem tot vnd seiner Hausfrawen vrowen Petersen vnd seines suns Otten, den paiden got genad, vnd aller seiner vodern pegen schullen mit vigili, Mit Messe vnd mit anderm rainen vnd gueten gepet nach des Ordens gewonhait. wir schullen auch an dem vorgenanten tag ewichleichen geben dem Conuent ainen dienst, Drew stuche gueter vische der pesten, di man ze der selben zeit vinden mag, vnd ein semlein prot vnd des pesten weins, der in dem vron cheler leit, ein phruent an alle wider red. Wer auer, daz wir den vorgenanten weingarten verchauffen wolten, so schul wir im oder seinen gerben ander guet gult auz czaigen, do von der dienst an des weingarten stat genczleich alle jar gegeben werd. wer auer, daz wir den vorgenanten dienst versezen vnd nicht geben, als vor geschriben ist, so schol sich der nechst gerb ziehen zu dem weingarten oder zu der gult, di do fuer auz gezaiget wiert Als lang, vntz ez von vns gepezzert wirt. Man schol auch von dem weingarten nyeman nicht dienen dann ainen Ember weins dem Perigmaister. vnd daz dize gescheft stet vnd vnzeprochen mit sant dem gelub peleib ewichleichen, dar vber geb wir Pruder Jacob ap (sic) ze dem Heyligen Chreutz vnd di samnung dem vor genanten hern Otten dem Tuersen vnd seinen gerben disen prief versigelten mit vnserm Hangunden Insigel zu eigen gezu^eeg diser sache. Der prief ist gegeben nach Christes gepurd drevtzehen hundert Jar, dar nach in dem Nevn vnd twainzigisten Jar an sand Matheiis tag des tzwelif poten datz dem Heyligen Chreutz.

Source Fulltext: OÖUB 5 (Wien 1868), S. 552-553, Nr. 553