Wir Friderich von gots gnaden Romischer Chunich, allczit ein merer des Richs Tu^en chunt offenlich mit disem brief, Daz wir vnserm getrewen lieben Chapplan Maister Rudolf dem Dorner Pharrer ze Vogan vnd Ertzpriester auf der nidern Steirmarch erlaubt haben vnd erlauben ouch mit disem brief, daz er sein Erbgu°t vnd sein aigen, daz do ze Grezzentz in den Puheln pei sand Giligen gelegen ist, vreileichen vnd ledichleichen verchouffen, verchummern vnd geben mach, swem er wil an allen ierrsal vnd sein wir des selben gu^etes rechte scherm fu^er alle ansprach vnd gepieten ouch vnserm houbtman in Steyr Vlrichen von Waltse oder wer houbtman nach im in Steyr werde, daz er dem, dem er daz vorgenant gu^et verchouft, versetzt oder geit, von vnsern wegen daz selbe gu^et scherme, daz domit nieman icht zeschaffen hab vnd daz man ouch dem dehain irrung daran tu^e; vnd geben im darumb den brief versigelten mit vnserm Insigel, Der ist geben ze Gretz an sand cholmans tag, Do man zalt von Christes geburde Drevtzehenhundert iar, darnach in dem newn vnd zwaintzigistem iar, Vnsers Richs in dem fumftzehenden iar.

Source Fulltext: OÖUB 5 (Wien 1868), S. 555-556, Nr. 556