ICH Aespein von Hag vnd ich Wernher. sein Sun wir veriechen offenwar an disem brief vnd tu^en kund allen den, dj in ansechennt oder ho^erennt lessenn, Das wir vns mit vnsern trewn an aydes statt verhaissen vnd verpunndenn haben vnd an vnser nachkomen, Erben statt gegen dem Edlen Herrn Graf Hainreichen von Schawnnberg vnd gen sein brüedern vnd gen allen irenn nachkomen, Erben, das wir dj Aerkker auf der Erde ze harthaim abgen vnd abvaulen Su^ellen lassen vnd was plancken da abfaullennt vnd brinent, sullen wir angeuar ander plancken hinbider setzen zu geleicher weiss, als dj vordern gewessen sein. Wir schulten auch dj graben an ir willen vnd wissen nichts pesernn, wann sy des tags gewesen sintt, da der brief darüber gegeben ist. Vnd das wir vnd all vnser nachkomen Erben in vnd allen jrn nachkomen, Erben das angeua^er also statt vnd vntzeprochen behaltenn, daru^eber zw ainem Vrkund geben wir in den brief mit vnsernn paiden anhangunden Insigln vnd mit des Erbern Herrn Hansen von Kappellen vnd mit Herrn dietmars von aistershaim Insigl versigelt, di der sachn taidinger sindt gewessen; vnd ist das geschechen zw Euerding an sannd Margrettn tag, do man zallt von Kristus gepurtt drewzechenhundertt Jar vnd in dem Newn vnd zwaintzigistenn Jarenn.

Source Fulltext: OÖUB 5 (Wien 1868), S. 547, Nr. 547