Allen den, die disen prief sehent oder horent lesen, tue wir chunt R°udolf Pharrer datz Haslach, Chunrat vnd Jacob Alhochs sun von vul, daz wir mit verdohtem muet vnd mit gu^etem willen vnser gunst vnd vnsern willen darzu° geben haben, daz her Ru°dolf der Erczpriester Pharrer datz Vogan vnser Ohaym sein aigen vnd sein erb guet, daz gelegen ist in den Puheln datz grezzentz pei sand Gilgen, daz in angeualleu von seiner mu^eter, deu vnser an was, vreileich geben, versetzen vnd verchaufen makch hern Herdegen vnserm herren von Pettawe oder swem er wil, daz well wir stet haben; vnd swem er daz selb guet geit, versetzt oder verchauft, den sag wir sicher vnd geloben an disem prief, daz wir vnd vnser erben in vnd sein erben dar vmb nimmer ansprechen, wand wir dem vorgenanten Erczpriester vnserm ohaim pilleich vnd gern hulfen mit vnserm aigen gu^et het wier sein stat, daz hat er wol vmb vns verdient, vnd daruber geb wir im disen prief zu ainem vrkund, an den wier vnser Insigel angehangen haben; vnd darzu° sint des gezeug Othakcher auz dem gehag von Rakeinspurch, der Cesarius Pharrer datz sand Gorgen, her Nicla Pharrer datz sand Benedicten, Herr vlreich vnd her Stephan gesell datz Rakeinspurch vnd ander piderleut; vnd ist der Prief gegeben datz Rakeinspurch an sand Katerein takch, do nach Christes gepurt ergangen warn Tausent drevhundert iar vnd dar nach in dem neun vnd zwaintzigistem iar.

Source Fulltext: OÖUB 5 (Wien 1868), S. 561-562, Nr. 559