Allen den, die disen Prief sehent oder horent lesen, tuen wir chunt Nycla chorher datz Volchenmarcht, Ru°dolf, Peter vnd Gorg Poppen sun weilent von Tunawe, daz wir mit verdohtem muet vnd mit gu^etem willen vnser gunst vnd vnsern willen darzu^e geben haben, daz her Ru°dolf der Ertzpriester Pharrer dacz Vogan vnser Ohaym sein aigen vnd sein erb gu^et, daz gelegen ist in den Puheln dacz Grezzentz pei sand Giligen, daz in angeuallen ist von seiner mueter, deu vnser an was, vreileich geben, versetzen vnd verchaufen mach hern Herdegen vnserm herren von Pettaw oder swem er wil, daz well wir stet haben vnd swem er daz selb guet geit, versetzt oder verchauft, den sag wir sicher vnd geloben an disem prief, daz wir vnd vnser erben in vnd sein erben darumb nimmer angesprechen, wand wir dem vorgenanten Ertzpriester vnserm ohaim pilleich vnd gern hulfen mit vnserm aigen guet, het wir sein stat, daz hat er wol vmb vns verdient. Vnd daruber zu ainem vrchund geb wir im disen prief, an den her Nycla Pharrer von Leybentz sein Insigel angehangen hat nach vnser pet, wand vnser idleicher hat nicht aigen Insigel; vnd darzu^e sint des gezeug Wolfel der Payer, Chunrat der Nazzawer, Ottel von Ekk, wergant, der dacz Hag gesezzen ist vnd ander pider leut. vnd ist daz geschehen vnd diser prief geschriben dacz Tunawe an dem Ergtag vor sand Andres takch, do nach Christes gepurd ergangen waren Tausent dro^ehundert iar vnd dar nach in dem neun vnd zwainczigstem Jar.

Source Fulltext: OÖUB 5 (Wien 1868), S. 563-564, Nr. 561