Ich Eberhart von Walsse zden zeiten Lantrichter ob der Ens vnd ich Anna sein Housfrow vnd alle vnser Erben wir verichen vnd tun chunt allen den, die disen Brief sehent lesent oder horent lesen, di nu lebent oder noch chumftig sint, daz wir recht vnd redleich vnd mit verdachtem muet mit vnserr Erben gunst vnd willen, mit gesamter hant vnd nach vnser besten vreunt rat zu chauffen haben gegeben dem Erbarn Ritter hern Dietreichen von Harach vnd seinem Bruder hern Wohuncken von Harach vnd ir baider Erben nach des Landes recht des ersten daz dorf in der Stiftung, daz dorf ze Eibenstain vnd di Hoff daz Vreydental vnd daz dorf ze Vreydental vnd daz dorf ze Swarzzenbach vnd di zwo Hub daz Eibenstain vnder dem Holtz. die vorbenanten guet haben wir in gegeben vnd verlihen mit allen den rechten, als si von alter her chomen sind, iz sei versucht oder vnuersucht, gestift oder vngestift, ze Holtz, ze Veld, ze dorff mit den zehent vnd mit sampt der Vischwaid vm acht hundert phunt vnd vm zwainzik phunt alter Wienner phenning, der wir von in reht vnd redleich verricht vnd gewert sein, Vnd sein auch der vorgenanten gut, vnd seu von vns habent zu rechtem Lehen, ir recht Herren vnd scherm vnd gewer an aller der stat, da in sein not geschiecht vnd als des Landes recht ist. Wir luben in auch mer, daz seu mit vnserm guetem willen vnd gunst bawen schullen auf die vorgenanten gut, an welcher stat iz in nucz oder fuegleich ist, seu oder ir Erben ein Vest mit allem dem recht vnd gunst, als vnss vnser Herren di fu^ersten von Osterreich erlaubt habent, dar vber wir irn Brief haben. War aber daz, daz seu oder ir Erben an dem vorgenanten bawe vnd guten iemen irred oder hindert, da schull wir seu vor schermen vnd in geholfen sein nach des Landes recht ze Osterreich oder tun wir des nicht, swas seu des schaden namen, den schull wir in ab tun vnd schullen haben auf vns vnd auf aller vnnserr hab, die wir haben in dem Land ze Osterreich. Daz in die red stat vnd vnuerchert beleib von vns, dar vber geben wir in disen Brief gesigelten zu einem waren Vrchund dirr sach Ich Eberhart von Walse mit meinem jnsigel vnd mit meiner Vetern jnsigel Hern Hainreichs vnd hern fridreichs Baider Bru^eder von Walse. Der Brief ist gegeben Nach Christes geburd dreuzehen Hundert jar, darnach in dem dreisczigisten jar an vnser Vrawn abent zder Liechtmesse.

Source Fulltext: OÖUB 5 (Wien 1868), S. 569-570, Nr. 568