Ich Chadolt der Busspech vergich vnd tv°n chund allen den, di nv sind vnd den, di her nach chunftich werdent, di disen prief ansehent lesent oder ho^ernt lesen, daz ich mit verdachtem mv^et, do ich daz wol macht getvn vnd mit Wernharts vnd Hadmares meiner peder bru^eder vnd aller anderr meiner Erben gutleichem willen han gesatzt ledichleichen Hoertweigen dem Rigler vnd vrovn Gerdrauten seiner Hausvrowen vnd aller ir peder erben ein lehen, daz mein aigen ist gewesen vnd haizzt des Chyenasts lehen, versu^echt vnd vnuersu^echet, ze holtz vnd ze veld, vmb ein genants gu^et, des ich recht vnd redleich an schaden pin verricht, mit sogtaner beschaidenhait, chaem ieman her nach, der pezzer recht haben wolt an dem lehen, der schol demselben Hoertweigen dem Rigler oder den vorgenanten seinen erben geben sechzich phunt newer wienner phenning an sand Michels tag seins aigenhaften guets an allez gevaert vnd wigtann schaden der vorgenant Rigler oder sein erben nement den ansprach gen dem lehen, den schullen siv haben auf mir vnd auf alle dev, vnd ich vnd mein erben haben in dem land ze osterreich, versucht vnd vnuersucht, vnd auf den vorgenanten mein zwain bru^edern Wernharten vnd Hadmarn, di mit sampt mir verhaizzen habent dar vmb, vnuerschaidenleichen von ainem auf den andern vnd pin auch ich Chadolt vnd mein erben vnd di vorgenanten mein ped bru^eder Wernhart vnd Hadmar mit sampt vns gewer des vorgenanten lehens vnd des satz dar auf desselben Hoertweigs des Rigler, vrovn Gerdrauten seiner hausvrowen vnd ir paider erben an aller der stat vnd in des durft wirt nach landsrecht. Vnd dar vmb daz disev red staet beleib vnd vnzebrochen, so gib ich dem vorgenanten Hoertweigen dem Rigler vnd der vorgenanten vrovn Gerdrauten seiner hausvrowen vnd ir peder erben disen brief bestaetigt mit meinem jnsigel vnd mit der vorgenanten meiner bru^eder jnsigel Wernharts vnd Hadmares zv einem v^erchund. Des sind gezevg her vreytel von winthag, her Ott der hauser, Hainreich der Imptzinger, vlreich der hauser, Ott der Sigpech, weitzel von oerbing vnd ander pidber laeut genv^ech. Der prief ist geben, do man zalt von Christs gepurd drevzehen hundert jar, dar nach in dem dreizzigistem jar an vnserr vrowen tag ze der liechtmess.

Source Fulltext: OÖUB 5 (Wien 1868), S. 570-571, Nr. 569