Ich Fridrich der Prueschinch vergich vnd tu°n chunt allen den, di disen brief sechent, lesent oder ho^ernt lesen, Daz ich mich mit guetem willen verpunden vnd verlvbt han gen dem Edeln Herren hern Eberharten von walsse zvder zeit lantrichter ob der Ens, ob daz wer, daz ich mein tail an dem Hous ze vroudenstain oder an anderm allen meimem gu°t ob der Ens nicht versporn noch gehaben mocht vnd daz verchouffen muest, Daz ich daz niem geben sol noch verchouffen, den dem vorgenanten hern Eberharten von walsse nach der zwaier mann rat hern Dyetreichen von weizzenberch vnd Fridreichs des Heusler, di diser sach vnd wandlung gezeug sint mit ir Insigel. wer aber daz, daz der ainer nicht enwer, des got nicht engeb, so schol ich ein andern an sein stat nemen, der mir dan zv fuegleich ist. vnd daz daz also stet vnd vnuerchert weleib, Dar vber gib ich disen brief versigelt mit meinem Insigel vnd mit Dyetreichs Insigel von weizzenberch vnd mit Fridreichs Insigel des Heusler, di diser sach gezeug sint. Der brief ist geben nach Christes gepurde Dreuzehen Hundert Jar in dem Dreizigstem jar, Dar nach des Mitichens nach sant Agnesen tag.

Source Fulltext: OÖUB 5 (Wien 1868), S. 568-569, Nr. 567