Ich Ortneid von Tannberch vnd Vlreich mein svn vergeben vnd tv^en chunt allen den, di disen prief sehent oder ho^erent lesen, Daz Ott der Nymmervol vnd Symon der Nymmervol vnd Heinreich der Renolter vnd sein svn Stephan habent di drev volgv^eltigev lehen datz dem Newndorf, di si von vns ze rechten lehen habent, versetzet habent (sic) dem Gotzhaus datz sand Marein slag vnd den prv^edern da selb ie der man sein lehen vmb zwai vnd fvmftzig phunt passawer phenning vnd Symon der Nymmervol di haistalt herwerig vmb fvmfzehen phunt phenning mit vnsrer hant vnd mit vnserm gv^eten willen ze rechtem satze Also beschaidenleich vnd mit sogetanen gelu^eb, wann der Probst vnd di prv^eder dez vorgenanten Gotzhavzz mv^egen erwerven vnd gewinnen den willen vnd di genad von vnserm herren dem Pischolfs von Passaw, so schv^ell wir vnd loben daz auch mit vnsern trewen, daz wir di selben gv^et machen vnd besta^etigen mit vnsers herren Hant dez Pischolfs von Passaw, dem oftgenanten Gotzhaus vnd den pru^edern datz sand Marein slag ewichleich ze haben. Vnd daz daz dem selben Gotzhavs staet vnd vnzerbrochen beleib, dar vber gib ich disen prief versigelten mit meinem jnsigel. Des sint gezevg her vlreich der pfarrer von velden, Chunrat der Peuntner, Fridreich der Mv^ezzganch von velden, Seybot der Schu^erf, vlreich der amman ab dem aygen, Ott dez Probstz schreiber vnd ander erber lev^et genvg. Der prief ist gegeben, do von Christes geburd woren ergangen Drevtzehenhvndert jar, dar nach in dem dreistgisten jar an sand Ayten tag.

Source Fulltext: OÖUB 5 (Wien 1868), S. 573, Nr. 571