Wir Leutolt vnd Rudolf gepruder Grafen von Sehovnberch veriehen offenlich mit disem brief, daz wir alle di prief, di wir von vnsern genaedigen herren den Edeln fu^ersten chunich friderich von Rom, dem got genade, vnd von seinen geprudern den hertzogen ze Osterrich vnd ze Styre vmb vnsern dinst vnd schaden, den wir in gen Osterrich getan vnd genomen haben, swi vil wir der haben, sullen wider geben vnd ze prechen an alleine den prief, den wir von in haben vmb di po^ergelsehaft ze Pazzowe vnd vmb di sechs hvndert phvnt, der si vns nv ouf sand Giligen tag richten sullen vnd veriehen dez fu^er vns vnd fu^er alle vnserr pru^eder vnd Erben, den wir daz staet haltten sullen vnd wellen mit sampt dem brief, den wir in ouch vor geben haben, vnd dez ze einem vrchvnd geben wir den vorgenanten vnsern herren den hertzogen von Osterrich disen brief für vns vnd fu^er vnser pru^eder vnd Erben versigelten mit vnsern jnsigeln, wann vnserr pru^eder ze den Zeiten da bei nicht gesein mo^echten, der ist geben ze wienn dez na^echsten montags nach sand agathen tag, da man zalt von Christes gebu^ert drevtzehen hvndert jar vnd dar nach in dem dreizzigisten jar.

Source Fulltext: OÖUB 5 (Wien 1868), S. 574, Nr. 572