ICH Ottachervon Egenperge vergieh offenbar an disem brief allen den, dj in ansechent, horennt oder lessennt, ob das ist, das ich meiner Herrn der Hertzogen ze Osterreich willen vnd gunst darzw gewinge oder gewinen mag, das ich ein werlich Haws auf das guett ze ynnskirichen, das ich vnd mein Hawsfraw fraw agnes vnd vnser Erben sun vnd tochtter, dj wir haben oder noch kunfftigklich gewingenn, vnd das wir von den Edlen vnseren gnädigen Herren Graf Hainreichen vnd graf Chunradten von Schawnberg zw rechtem lehen haben, pawe, das daz mit meiner Herren von Schawnberg guetlichem willen, gunst vnd fuedrung geschechen soll Also mit der beschaidenn, das ich vor zw in komen sol, ee ich das paw anheb vnd sol in das vermachen mit gueter sta^ett vnd peen, der sy vnd ir Erben nottdurfftig sein nach zwaier oder dreier irer Ra^ett Ratt vnd nach meiner frewnd Ratt, das in vnd iren Erben vnd den iren von der Herverig ewigclich nur gediennt sol werden vnd nicht vngediennt. Vnd das das also statt vnd vnzuprochen beleib, Daruber zw ainem Vrkund gib ich in disen brief mit meinem Insigl versigelt, Der geben ist zw Schawnnberg an sannd Gregoren tag, do man zallt von Kristi gepurd Drewzechenhundertt Jar vnd in dem zway vnd dreissigistenn Jar.

Source Fulltext: OÖUB 6 (Wien 1972), S. 54f., Nr. 46