Wir Albrecht vnd Ott von Gottes gnaden Herczogen ze O^esterreich vnd ze Steyr Veriehen und Tu^en chunt offenlichen mit disem brief fu^er vns, vnser Erben vnd nahchomen, Daz wir mit wol verdachtem mu^et vnd mit gu^etem rat den Chirhensacz vnd die vogttey der Chirchen ze Oberleyzze, di vns zvgehorent, auzgewechselt vnd geben haben dem Edeln mann vnserm lieben Graf Chunraten von Schownberch vmb den Chirhensacz vnd di Vogttey der Chirhen ze Ruprehczhofen also, daz er, sein Erben vnd sein Nahchomen den vorgeschriben Chirhensacz ze Leyzze vnd die Vogttey do selbs fu^erbaz ewichlichen mit allen rechtten vnd nuczen, als wier sev und vnser vo^erdern vnz her pracht vnd inngehabt haben, niezzen vnd haben sullen vnd allen iern frumen do mit schaffen, so ez in aller beste fuget. Wier sin ouh sein, seiner Erben vnd seiner Nahchomen des vo^ergeschriben auswechsels rehtter Scherm vnd gewer gen aller me\anlichen nach des Landes recht ze O^esterreich. Vnd des ze einem offenn vrchunde vnd sicherhayt geben wier im, sinen Erben vnd sinen Nahkomen disen brief besigeltn mit vnsern anhangunden jnsigeln, Der geben ist ze wienn, Do man zalt von christes geburde Tavsent Dreuhundert jar, darnach in dem zway vnd Dreizzigistem jar des nahsten Mitichens vor vnser Vrowen tag der Liehtmisse.

Source Fulltext: OÖUB 6 (Wien 1972), S. 49f., Nr. 41