Wu^er Albrecht vnd Otto von gottes Genaden Herczogen ze o^esterreich vnd zu Steyr thun khundt offentlich mit disem brief, das wu^er vnserm lieben oheim graue Albrechten von Orttenberg, seinen Erben oder wen er es schaffet, von seines diensts wegen vnd von den schaden, so er Genomen hat an dem Streitt, da die von Lippen gefangen wurden, Gelobt haben zugeben Bey vnsern treuen, auf den Sontag zu Miterfasten, der schierist kombt, sechshundert Marckh Silber jn 72 Groschen für jegliche Marckh Vnd wer, daz wir jm daz verzugen, daz er auf denselben tag nit gewehret wurde Vnd dass wür Herczog Albrecht abgiengen, dess Gott nit wo^ell, Vnd wir Herczog Ott in dan nicht Richten dess guetts, so soll Vnser getreuer Lieber graf vlrich von Pfannenberg Marschalckh in o^esterreich etc. Hainrich von der Lippen vnd sein Gesellschafft, die vns der von haalss geantwordt hat, Alss lang jnne haben, Vnd vnz dass die vorgeschriben sechshundert Marckh Silber Vergolten werdent. Gieng aber graff Albrecht von orttenberg ab, dass gott nicht gebe, so soll man denselben gefangen dem Edlen Mann Graue Heinrich von Schaunberg einantworten, der von derselben gefangen dess guetts bekhomen soll an dess vorgenenten graue Albrecht von orttenberg Erben Statt oder wen er es schaffet Vnd soll die v^ebrigen gefangen Vnss wider Einantworten, die wür dan zu Vnserm fromen jnnhaben sollen. Vnd geben des zu einem offen Vrkunde vnd Sicherheit geben wu^er disen brief Versigelten mit Vnserm jnsigeln, Der geben ist zu Wienn an dem Sontag, so man singet Reminiscere Anno domini Millessimo Tricentessimo Secundo.

Source Fulltext: OÖUB 6 (Wien 1972), S. 56f., Nr. 48