Ich wernhart der Mezzenpech vnd mein Housfrow Gedraut vnd all vnser Erben wier veriehen vnd tun chunt allen den, die disen brief sehent lesent oder horent lesen, di nu lebent oder hernach chunftig sint, Daz wier hern Hainrichen dem Stainpechen vnd vrow Chunigunten seiner Housfrown vnd ier Erben, di sev miteinander habent oder gewinnent, redleich vnd reht mit wolbedachtem mu^et vnd mit vnser Erben Gu^etleichen willen ze Chauffen haben gegeben di gu^et, di hie benent stent, daz erst datz dem Tumel bei vreudenstain vnd dev zehentel in Veldchirichoer pfarr, di der Schaub von mir hat gehabt, Vnd daz gu^et datz dem Stoedellein vnd zway gut datz den Smiden, die Chunrat der Leussinger hat gehabt, mit alle dev, vnd dazv^e gehort ze holtz, ze veld, besu^echt vnd vnbesu^echt, vmb zehen phunt winner phenning, der wir gar gewert sein, vnd haben auch di selben gu^et aufgegeben vnt sint in verlihen von vnserm genaedigen herren Bischof Albrecht von Pazzaw Vnd bin auch der selben gu^et ir gewer nach des landes reht vnd schullen daz haben auf vns vnd auf vnserm gu^et. Daz di red staet vnd vnzebrochen von vns beleib, darvber geben wier disen brief gesigelten Ich wernhart der Mezzenpech mit meinem anhangunden Insigel vnd mit hern vlreichs des Pru^eschinchen jnsigel. Der brief ist gegeben Nach Christ gebu^erd Drevzehen Hundert jar, darnach in dem zwai vnd dreizigisten jar an vnser vrown Tag zder dienstzeit.

Source Fulltext: OÖUB 6 (Wien 1972), S. 75f., Nr. 66