Ich Graf Hainrich von Schonberch vergich Vnnd offen Allen denn, die disen brief sehent oder ho^erent lesen, daz di Erbern Mann Chunrat der furter, Ottacher vnd Alber sein bruder mit zeitigem Rat jer freunt vnd mit guetem wisen jr vnd aller jr Erben durch got vnd ze Seelgeret ab jr Seel vnd aller jer vordern habent dem gozhauz ze Wülhering gegeben jr rechtes vnd vreyes aigen vnd darauf jeman dhains rechz zeichen vnd gesprechen mach, daz ist ein gu^et ze Herstorff bey der jnn vnd ein gu°t ze Prukh pey Pernbach vnd ain gut daz Roenharzdorff in dem Hachenpach mit allen den vnd darzu geho^ert, besuecht vnd vnbesuecht, ze holz vnd ze veld ledicleichen vnd Ewichleichen ze haben in rechter aigens gewer an allen chrieg vnd habent daz getan in solicher Beschaidenheit, daz mann von dem vorgenanten guet jaerchleichen nach dem Sunnewenden an sand Peters abend den Herrn ze Wilhering in jr Refect (sic) gemainchleichen ze Pezzerung jr Phrunt geben vnd diennen sol ein gut mal mit vischen vnd mit Weiczen brot ze Hail vnd zetrost jr Seel, vnd daz dise gab vnd auch andacht staet vnd vnuerchert beleibe, des gib ich dem gozhaus ze Wilhering vnd den Herrn daselben ze einem vrchunt disen brief versigelten mit meinem jnsigel vnd mit der vorgenanten bruder Chunracz, Ottachers vnd Albers der furtter jnsigel vnd daz ist ergangen, da von Christes geburd waren dreyzehenhundert jar, darnach in dem zway vnd dreysigisten jar an Sant Veites tach des Heiligen Martrer.

Source Fulltext: OÖUB 6 (Wien 1972), S. 66f., Nr. 57