Wir fridreich von gotes genaden Ertzbischolf ze Salzburch, Legat des stu^els ze Rom veriehen offenbar an disem brief vnd tu^en chunt allen den, di in sehent oder ho^erent lesen, Daz der Edel man Amelrich von Pettow der pfarchirchen datz sant Veit ze Vogan gelo^eset hat vmb fu^emf march Silbers einen zehent ze Pratenswartzach in der pfarr ze vogan, der von derselben pfarr lange enpfremdet gewesen ist vnd hat den der êgenanten Chirchen ledichlichen wider geben vnd geantwurtet also, daz Maister Ru°dolf der Dorner Ertzbriester ouf der nidern Steirmarich, der ietzv^e pfarrer ze vogan ist vnd alle sein nachchomen pfarrer do selbs alle Ma^entag oder einen andern tag in der wochen ein Sel messe haben in der Chirchen ze vogan durch des vor genanten Amelrichs von Pettow vnd Agnesen seiner wirtinn vnd besunder durch fridrichs von Pettow vnd Herwirgen siner Hovsfrown sa^eligen sele willen alle jar an sand Othmars tag einen jar tag begên sol mit vigilij vnd mit Selmesse, als man anderr toten jar tag beget. Ez sol auch der selbe pfarrer alle Suntag, so man der toten offenlich gedenchet, besunder gedenchen des vorgenanten fridreichs von Pettow vnd Herwirgen seiner Hovsfrown vnd irer vordern, vnd so man der lebentigen gedenchet, so sol man des obgenanten Amelrichs von Pettow vnd seiner wirtinn Agnesen vnd ir erben ouch gedenchen vnd nach ir tod sol man ir peder pi namen vnd irer vordern vleizzichlichen gedenchen mit toten. Di vorgeschriben sache besta^eten vnd bewa^eren wir mit disem brief versigelten mit vnserm anhangenden jnsigel. Der ist geben ze Pettow an der zwelf poten sand Symons vnd sand Judas tag, Do von Christes geburd woren Drevzehen Hundert jar, dar nach in dem zwai vnd dreizzikisten jar.

Source Fulltext: OÖUB 6 (Wien 1972), S. 76f., Nr. 67