ICH Peter der Vreysinger ze den Zeiten Perchmaister des Gotshauss ze Nevmbu^erch vergieh vnd tu^en chunt alle den, die disen prief lesent oder ho^erent lesen, di nu lebent oder hernach chumpftig sind, daz Chunrat von weydinch vnd sein hausfrow offmey vnd ier erben recht vnd redleich verchauft Habent iern weingarten, der do haizt die Ro^es, des ein viertail ist vnd leit in dem weingraben zenachst des alsser weingarten, vmb ainz vnd dreyzk pfund wienner pfenning dem erbern hern Lybawn von Tru^echssen vnd seiner hausfrown vrown Hoelken vnd iern erben, der sev recht vnd redleich gewert sind. Iz hat auch Starichant vnd sein hausfrow Margret vnd ier erben recht vnd redleich verchauft iern weingarten, des ayn viertail ist vnd leit in dem Chochgraben zenachst dem Swerhepplein vmb dreyzk pfunt pfenning wienner münzz dem egenanten Hern Lybawn von Tru^echssen vnd seiner hausfrown vrowm Haelken vnd iern erben, der sev auch recht vnd redleich gewert sind vnd domit derselb weingart von den juden gelost ist; Hab auch ich vorgenanter Peter der vreysinger dem egenanten hern Lybawn von Tru^echssen vnd seiner hausfrown vrown Haelken vnd iern erben dev paid weingarten gelihen ze rechtem perchrecht, ze verchauffen oder versetzen oder geben, wem sev weln, an allen ierrsal. Sich setzent auch die vo^ergenanten Chu^enrat von weydinch vnd sein housfrow offmey vnd ier erben vnd Starichant vnd sein housfrow margret vnd ier erben ein isleicher fu^er sein weingarten dem oftgenanten hern Lybawn von Tru^echssen vnd seiner housfrown vrown Haelken vnd iern erben ze rechten gwern vnd ze Scherm fu^er sich vnd fu^er ier erben, als des landes recht ist ze Osterreich. Nemen auer sev des chain schaden, iz sei mit zerung oder mit nachraysen oder von welicher hand ansprach daz wer, den schuln sev in ablegen vnd schuln sev den Haben auf iern trewn vnd auf alle dem gu^et, daz sev habent, vnd daz der chauf also geschehen sei, des gib ich vorgenanter Peter der Vreysinger dem oftgenanten hern Lybavn von Truchssen vnd seiner housfrown vrown Haelken vnd iern erben disen prief ze ainem waren gezing versigelten mit meinem insigel. diser sach sind auch ziug Chu^enrat der Schifer, wernhart vnder der Lauben, Ortolf der hofmaister vnd ander erber lout genug, den dise sach wol chunt ist. Der prief ist geben ze Nevmbu^erch chlo^esterhalb, do man zalt von christes gepurd dreutzehen hundert iar, darnach in dem zwayn vnd dreyzkisten iar an sand Valteins tag.

Source Fulltext: OÖUB 6 (Wien 1972), S. 44f., Nr. 36