Wir Hainrich, Chunradt, Wernhart, Ruedolff, wilhalbm, Lewtold, Fridreich gebrueder vnd vettern grauen von Schawnberg veriechen offenwar an disem brief vnd tun kundt allen den, dj in sehennt, lesent oder lesen horent, das wir vnns mit veraintem Muett nach vnser pesten frewndt vnd nach vnser Rates Ratt gantzlich verricht vnd betaidingt haben mit der Erbern statt ze Regenspurgck vnd mit allen jren purigern Reichen vnd armen vmb aller der ansprach vnd vordrung, der sy hintz vns gehabt habent vntzt auf den hewtigen tag, also mit der Maynung, das wir in fu^er ir alle jr ansprach vnd vordrung, dj sy hintz vns hetten oder gehaben mochten, geben sullen funff hundertt Marck silbers. ye zwen vnd sibentzig gut zall gros pehaimiseh phenning fu^er ain marck silber. Vnd für dj selben funf hundertt marck silbers haben wir in vnd ir statt mit vnser aller gutlichem willen vnd guetter gunst zw ainem rechtem pfannt gesatzt dew recht, der wir von jren gut an geuar gehabt haben an vnnser Mawtt zw Asschach also, das sy vns vnd allen vnsern Eriben alle dj weil, vnd wir sew der benanten funf hundertt Marck silbers nicht gantzlich gewertt haben vnd der selben rechtt von in darumb nicht gelost habenn, nicht mer gelten schullen, dan jrew altew recht, von ainem yedem podem, welherlay gutt sy darauf furennt, das ir ist vnd zw der statt Regenspurgck gehortt, dan (?) zwen vnd dreissig regenspurger phenning, dj dan gib vnd gab sind, vnd zway phunt pheffers, zwo hawben vnd zwo huetsnu^er vnd zwelif letz phenning Regenspurger Mu^ens, als es mit alter gewonhaitt herkomen ist, (vnd von ainem yglichem podem, welherlay sy darauf furent, das angeuar ir ist vnd zw der statt regenspurgk geho^erennt, zwen vnd, dreissigk wienner phenning, dj dan gib vnd gab sind, vnd zway phunt pheffer yrew altew rechtt vnd zwo hawbn vnd zwo huettsnu^er vnd zwelif letzphenning wienner Mu^ens) als es auch vorgeschriben ist. Wir geloben auch in vnd irer statt alle vnuerschaidenlich mit vnsern trewen an alles geuar, das wir vnd alle vnser Eriben vnd alle vnser frewndt vnd alle vnser dienner der vorberurten statt vnd alle jren purigern an jrem vorgeschribem pfannt mit nichtew jrren, Hindern noch Engen schullen, vntzt wir oder vnser Erben derselben Mautleichen recht von in gantzlich losen vnd ledigen vmb das egeschribenn silber. Wir haben auch vnd vnser Erben voligen gewalt das obgenant phannt von in ze losen, wan wir wellen, vmb dew oftgenanten funf hundert marck silber ze Regenspurgk in der statt vnd schullen auch wir in dan widergebn jeren brief, den wir haben von in vnd von jrer statt v^eber den selbn satz, das wir gewalt gehabt haben ze losen vnd geloben in das mit vnsern trewen. Vnd daruber geben wir in ze ainem vrkund disen brief mit vnser aller anhangunden Insigln versiglten. Der brief ist geben Nach Kristi gepu^erd drewzechen Hundertt jar vnd in dem zway vnd dreissigistenn jar an dem heiligen Abennt ze Weinachtten ze passaw in der Statt.

Source Fulltext: OÖUB 6 (Wien 1972), S. 80f., Nr. 71