Wir Fridreich der Awoer von Prennberch Purgermaister vnd der Rat vnd alle di gemain der Stat ze Regetispu^erch veriehen offenlich an disem Brief alle den, di in sehent oder ho^ernt Lesen, Daz wir vns mit veraintem vnd wolbedachtem mu^eet mit den Edeln Herren Graf Heinrichen, Graf Chu^enraten, Graf wernharten, Graf Rvedolfen, Graf Wilhalm, Graf Leutolden, Graf Fridrichen, Graf Otten vnd mit allen Bru^eedern, vetern, Grafen von Schawnberch gaentzlich bericht vnd betaidingt haben vmb alle di ansprach, vodrung vnd Chrieg, di wir hintz in vnd hintz irn Dyenern gehabt haben oder gehaben mochten mit recht oder an recht vntz auf disen heutigen Tag also, daz di selb ansprach, vodrung vnd Chrieg vnd aller vnwill, der zwischen vns, in vnd allen irn dienern da von gewesen ist, sol fu^erbaz lauterlich vnd gaentzlich ab vnd hin sein vnd daz lob wier in vnuerschaidenlich mit vnsern trewen. Vnd dar v^eber ze einem vesten vnd sichtigen v^erchu^end geben wir in disen offenn Brief mit vnsrer Stat anhangendem Insigel besigelten. Der Brief ist geben ze Pazzawe, da man zalt von Christes Gebu^ertt Tausent Jar, dreu Hundert Jar in dem zwai vnd Dreizzkistem Jar an dem Heyligen abent ze Waeynachten.

Source Fulltext: OÖUB 6 (Wien 1972), S. 81f., Nr. 72