Wir Ott von Gotes genaden Pfallntzgraf ze Rein vnd Hertzog In Bayern veriehen offenbar an dem brief, wan der ersam Probst vnd der Conuentt des Gotzhaus vnser frawn ze dem Siegeln in dem wald vns fu^er habent pracht ir offen brief, Di wir aigenleich vernomen vnd verho^ert haben Also, das das Gotzhaus von vns, von vnserm Brv^eder vnd auch von vnserm vetern saeligen ein freyung habent ewichleichen ze fu^eren zaimel (sic) in dem jar, als sittleich vnd gewondleich ist, ain pfunt weitz und vier pfunt chlaines Saltzes, vnd di selben freyung bestaeten wir in mit disem brief Also, das wir wellen, das dhain vnser Mauttner ze Purchausen noch amptmann si an der mautt mit dhainer lay voderung noch irrung dar an nicht beswaeren noch irren, wan wir wellen, das si frey vnd ledich fu^er varen an all voderung vnd ierrung. Vnd dar v^eber ze einem vrchund geben wir in disen brief versigelten mit vnserm jnsigel, der geben ist ze Pazzaw an dem pfintztag vor Sand Gorigen tag, Do man von Christes gepurt zalt Tausent jar Drevhundert jar vnd im vier vnd dreisgisten jar.

Source Fulltext: OÖUB 6 (Wien 1972), S. 118, Nr. 110