ICH Hainrich von Hakenberch vnd Kathrey mein Housfrow vnd vnser Erben veriehen vnd tun chunt offenbar hie mit disem Brif, Daz jch meinem liben Ohem Eberharten von Waltse vnd seinen Erben geben sol zwai vnd Drizzich Pfunt alter Pfenning wienner Muncz, Dar vmb Er mein parig ist worden von dem wirdigen Herren Pischolf Chunraten von freising. Wir suIIen in vnd sein Erben der vorgennnten Pfenning weren zehen Pfunt an Sand Maerteinstag, der chirist chomt, vnd zehen Pfunt an Sand Georitag vnd zwelif Pfunt an Sand Maerteins tag, der dar nach chunftich wirt. geschech des nicht also, daz wir in vnd sein erben ze einem iglichen tag nicht entberten als vorgeschriben stat, so sol Er vnd sein Erben die vorgenanten Pfenning nemen ze Christen vnd ze Juden vf vnsern schaden vnd waz Er vnd sein Erben des schaden nement, den siu geraitten vnd gezelen mugen, den sul wir in allen widercheren an allen chrieg. Daz die red also steet belib, Dar vber gib Ich Hainrich von Hakenberch den Brief versigelten mit meinem Insigel, Der geben ist, da von Christes geburd waren ergangen Dreuczehen Hundert Jar, dar nach in dem Virden vnd Drizzigisten Jar, des Sunntages nach Sand Vrbans tag.

Source Fulltext: OÖUB 6 (Wien 1972), S. 123f., Nr. 115