Ich Alber von Volchenstorf vergich offenlich vnd tun kunt an disem prief Allen den, die in sehent oder horent lesen, Daz mich her Ott Houser ze den zeiten Purgraf ze Steyr verricht und ingeantwurtet hat hundert phunt geldes in der Hofmarch vnd in dem Molntal gelegen, also hernach geschrieben stet, zwainczig phunt vnd vier vnd zwaintzig phenning vnd vier vnd Sibentzig Mutt habern vnd Sechs Metzen Siben Mutt chorns vnd Siben Metzen vnd einen halben Metzen, Zwai hundert Chêse vnd Sibentzehen, zwaintzig phunt ayr, drey schilling vnd funf ayr, Aynlef Hundert huener vnd fumf vnd Achtzig Ains vnd Sechtzig Swein, zwaintzig lemper vnd vierdhalbes vnd ain Drittayl vnd drey gens, fumfthalben Metzen Magen. Vnd ist nun der vorgenant gelt also ze phenning geslagen, den Mut habern fur fumf schilling, den Mutt chorns fu^er zehen schilling, Ain Swein für Sechczig, einen Chese für ainen phenning, ain huen für ainen phenning, fumfczehen ayr fûr ainen phenning, ain lamp für zwelf phenning, ain gans für vier phenning, ainen Metzen Magen für vierczig phenning. Der Summ wird also hundert phunt an fumf phenning vnd hat ouch mir der Houser daz vorgenant gut ingantwurt in allem dem recht vnd nutzen, Also mainer payder herren Hertzog Albrecht vnd hertzog Ott prief sagent vnd habent. vnd dar vber zu einem vrchund gib ich disen offenn prief versigelt mit meinem Insigel, Datum Anno dnmini M.° ccc.mo xxxiiijto proxima dominica post festum beati Michahelis.

Source Fulltext: OÖUB 6 (Wien 1972), S. 138f., Nr. 130