Wjr Albrecht vnd Ott von Gottes gnaden Herczogen ze O^esterreich vnd ze Styr Veriehen vnd tun chunt offenlich mit disem brief allen die in sehent, lesent oder ho^erent lesen, Daz fu^er vns chomen vnser getriwer Johann der Tu^ers von Rauhenekk, Kathrey sein Housvrow vnd Reinprecht des selben Tu^ersen Vetter vnd gaben vns auf die Vesten ze Lichttenuels, die von vns lehen ist, mit allem gut, so darzu gehoret ze veld, ze Dorf, gestift oder vngestift, versucht oder vnuersuchet, ez sein Chirichense\acz, v^erwar vnd gricht, swie so daz benant ist, daz haben wier von in aufgenomen vnd haben daz verliehen vnd leyhen ouch mit disem brief vnserm getriwen lieben johansen von Chappell vnd allen sinen erben ze rechtem Lehen, dem si ez ouch mit vnser hant, gunst vnd gu^etem willen ze chouffen geben habent also, daz der selb Chappeller mit sampt sinen erben die selben vest mit allem dem gu^et, als vo^er geschriben ist vnd mit allen nuczen vnd rehtten, so darzu° geho^erent, fu^erbaz innehaben vnd niezzen sullen nach Lehens recht vnd allen iern fru^emen do mit schaffen mit verchouffen, mit verseczen vnd geben, swem si wellent, an alle ierrung vnd sein ouch wier des ier rehtter Herre vnd ier scherm nach vnsers Landes recht vnd gewonhait in O^esterreich. Des geben wir zu^e einem offenn v^erchunde vnd sicherhait disem brief besigelten mit vnsern anhangunden jnsigeln. Der geben ist ze wienne des nahsten Phincztages vo^er sand Gregorien tag, do man zalt von Gottes gebu^erde Tûsent Drevhundert jar, darnach in dem fvmf vnd Drizzigistem jar.

Source Fulltext: OÖUB 6 (Wien 1972), S. 150, Nr. 143