Ich Vlreich, Wernharts Prvder des Richter von Droeschirchen vergich vnd Tvn chunt allen den, die disen prief lesent oder horent lesen, Die nu lebent vnd her nach chvnftich sint, Daz ich mit gvtem willen vnd gunst meiner Erben, mit verdachtem mvte zv der zeit, da ich ez wol getvn mochte vnd auch mit meines Lehenherren hant, Des Erbern Geystlichen Herren Apt Gvndachers von Melich Recht vnd redlichen verchauft han Meinen Weintzehenten, den jch von jm ze Lehen gehabt han, Der da leit auff vier weingarten ze Gvmpolteschirchen jn dem Tevffental mit allem dem Nutzze vnd Rechte als ich Den selben zehenten jn Lehens gewer her pracht han, vmb zwelif Phunt phenninge wienner Mvntzze, Der jch gar vnd gentzlichen verricht vnd gewert pin, Dem erbern Herren hern Vlrichen von Pergawe, zv den Zeiten Hofemaister Hertzog Albrechtes jn O^esterriche vnd in Steyr, vnd seinen Erben fvrbaz Ledichlichen vnd vreilichen ze haben vnd allen seinen frumen Da mit ze schaffen, verchauffen, versetzzen vnd geben Swem Er wil, als jm das wol chome vnd fvge an allen irresal. Vnd pin auch jch des selben vorgenanten zehenten mit sampt meinen Erben fvrbaz sein Rechter Scherm vnd gewer fvr alle ansprache als Lehens recht ist vnd Des Landes Rechte ze O^esterriche. Vnd daz dise Rede fyrbaz also staete sei, Dar vber so gibe ich jm disen prief zv einem offen vrchvnde vnd gezevge vnd zv einer Ewigen vestnunge versigelten mit Meinem Insigel vnd mit des Erbern Mannes jnsigel meines Oheymes Wernhartes jn dem Tvrn, Purger ze Der Newenstat, Der diser sache gezevge ist, mit seinem jnsigel, vnd ander Erber Levte genvech. Diser prief ist geben ze wienne nach Christes gepvrt Drevtzehen Hundert jar, Dar nach jn dem fvmf vnd Dreizzigistem jar Des suntages ze Mitterr vasten.

Source Fulltext: OÖUB 6 (Wien 1972), S. 153f., Nr. 148