Ich Vlreich Lawer vnd mein Housvrow vrow Demuet vnd all vnser erben vergechen offenleich mit disem brif vnd tun chunt allen, di in horent, sechent oder lesent, di nv sint oder noch chumftig wernt, daz wir mit wolbedachtem mut vnd mit gutleichem willen vnd wort aller vnser eriben vnd nach rat vnser pesten vreunt recht vnd redleich ze chauffen haben gegeben hern Heinreichen dem Gewman vnd sein erben daz gu^et ze Harlungsperig vnd daz gut ze Rotelperig vnd daz ain gut dacz Lechen, di vnser rechtz aygen gewesen sint von den fursten von Ostereich, mit alle dev, vnd dar zv^e geho^ert ze holcz, ze veld, versucht vnd vnuersucht, vmb ein gelt, des si vns verricht vnd gewert habent, vnd schullen auch der selben gut ir gewer sein ze hof, ze tayding an aller stat, vnd in des not geschicht, als des Lantz recht ist ob der ens vnd swaz in dar an ab get, daz schullen si haben auf vns vnd auf aller vnser hab, wo wir di haben in paiern oder in Osterreich, versucht oder vnuersucht. ez sol auch, swer vogt ze Wels ist, anders mit den vorgenanten guten nicht weder vil noch wenich zeschaffen haben nur als vil, ob di gut mit dehaine ansprach begriffen wurden, von swem daz wer, so sol denn der vogt ze Wels der selben gut vnd des gruntz denn ein gemainer richter vnd ein verhorer an als geuer sein, anders sint im di gut nichtz gepunten. vnd daz in di wandlung also stet vnd vnuerchert beleib, Dar vber ze einem vrchunt geben wir in disen brif versigelten mit vnserm anhangunten jnsigel vnd mit hern Ditreichs jnsigel von Harach, d e ze den Zeiten gwaltiger vogt was ze wels vnd mit Gerunges jnsigel ron Asenheim. Der brif ist geben ze Wels nach Christes gepurt vber Dreuzehen Hundert jar, darnach im funf vnd Dreiskistem jar an sand Michhels tag des heiligen Engels.

Source Fulltext: OÖUB 6 (Wien 1972), S. 179, Nr. 172