Wir Christein ze den Zeiten Aptissinne ze sand Nycla ze wienne vnd all di samnung vnsers conuentz veriehen an disem prief, Daz wir dem Erbern herren hern Eberhart von walsse ze Lincz vnd seinen erben Haben geben Ab zelo^esen sechzig Phenning geldes Gruntrechtz vnd Achczehen Phenning geldes, di man vns dient vu^er vier huenr von Aim haws, daz da leit in der Stat ze wiene pei der Pu^erge, Daz vns geschaft ist von hern Paltram dem vaczen, dem got genad, vnd haben im di vorgenanten gulte geben vm zwai phunt Phenning wiener mu^enzze, Der er vns gewert hat Recht vnd redlich mit vrchund ditz prifs. Dar vber geb wir im vnd seinen erben disen Prief ze Ainer bestaetegung diser sache mit vnserm Anhangundem Insigel. Der prief ist geben nach Christz gepurt Drewzehenhundert jar, dar nach in dem fumf vnd Dreisigten jar dez suntags vor Phingsten.

Source Fulltext: OÖUB 6 (Wien 1972), S. 168, Nr. 161