Ich Lybavn von Tru^echssen vnd ich Hertneid von Tru^echssen vergehen offenlieh mit disem Prief, daz wir recht vnd redleich ze chauffen haben geben vnser Haus ze Pernstain, daz vnser recht aigen ist, dem Erbern herren herrn Eberhart von Walsse vnd sein Erben vnd allez, daz da zu geho^ert, vm fu^enfthalb Tausent Pfunt alter wienner Pfenning, der er vns wêren vnd richten sol zu den naechsten Svnbenten vier Hundert Pfunt als lang, vncz er vnd sein Erben vns vnd vnser Erben der fu^enfthalb tausent Pfunt gancz vnd gar gericht werden (sic). Vnd zu einer sicherhait des vorgenanten Gu^etes antwu^ert er vns in in nvez vnd in gewer sein Haus ze Senftenberch vnd Zebing mit alle dev, vnd dar zu geho^ert mit leut vnd mit Gu^et, mit Weinwachs vnd mit allen nu^eczen vnd waz noch dar zu cho^emen mag jn der beschaidenhait, ob er vnd sein Erben mich vnd mein erben oder swem ich iz schaffen wil, pei mir lebentigen oder nach meinem To^ed oder swie ich iz wandeln wil, nicht entwerten zu den vorgenanten taegen der vier Hundert Pfunt, als vor verschriben ist, so sol ich mich selber vorgenanter Lybavn von Tru^echssen der vier Hvndert Pfunt weren nach meinen trewen von den nu^eczen, die zu Senftenberch geho^erent, als auch vor geschriben ist. Ist aver, daz ich oder mein Erben zv den rechten tagen der vier Hundert Pfunt gewert werden, so sol ich vnd mein erben mit den nv^eczen, di zv Senftenberch geho^erent, nichts nicht ze schaffen haben vnd der egenant Her Eberhart vnd sein erben allen irn frum da mit schaffen. Ich sol auch daz Haus ze Senftenberch mit alle dev, vnd dar zu geho^ert in nuez vnd in gewer haben als lang, vncz ich des obgenanten Gu^ets gancz vnd gar werd gericht. Si sind auch des selben Haus mein Scherm vnd mein Gewer nach landes recht Vnd loben im auch diseu red staet ze behalten mit vnsern trewen vnd gib ich im dar vber disen Prief versigelt mit meim anhangundem Insigel. Der Prief ist gegeben nach Christ gepurd, da ergangen waren dreuzehen Hundert jar, dar nach in dem siben vnd Dreizkistem Jar an sand Mathias abent.

Source Fulltext: OÖUB 6 (Wien 1972), S. 228f., Nr. 224