Ich Fridreich der Prueschinch vergich vnd tu^en Chvnt allen den, die disen brief lesent oder Horent lesen, Daz ich gelten sol meinem swager Hern Dietreichen von Weizzenberch dem Eltern vnd seiner hausvrowen vrowen Annen meiner swester vnd ir paider erben Achthalb phvnt vnd zwaintzich phvnt wienner phenning vnd han in dafv^er gesatzt ze Rechter satzvnge nach dez Landes recht ze O^esterreich mit meiner erben gu°ten willen vnd gvnst, mit verdachtem mu°t zv° der zeit, do ich ez wol getv°n mocht, meines rechten satzes, daz mein satzvng ist von Hern Eberharten von walse hauptman ob der Ens, meinen halben tail, den ich han an den siben phvnden wienner phenning geltes, Die gelegen sint Dez ersten datz Traisem auf einer Mv°l zwen mutt waitzes geltes vnd datz winchlarn ein phvnt phenning geltes, Datz Gvndoltzstorf ein halb phvnt vnd sechs vnd sechtzich phenning geltes vnd anderthalben mutte Chorn geltes fv°r zwelif schilling vnd anderthalben mutte habern geltes fv°r sechs schilling vnd acht Chaes geltes fv°r sechtzehen phenning vnd sechtzich ayer geltes fu^er sechs phenning vnd zwu^e gens vnd vier huener fu^er sechtzehen phenning, Daz allez gelegen ist auf gestifftem gu°t behauster holden, Also mit ausgenomner rede, alle die weil ich si der vorgenanten achthalben phvnt vnd zwaintzich phvnt wienner phenning nicht wer, so svllen si meinen tail die Egenanten gult halbe in nutz vnd in gewer inne haben vnd niezzen vnd nu^etzen ze gleicher weis alz ich selber an allen abslach vnd swenneich oder mein erben den selben meinen tail satzes lo^esen wellen, daz su^ellen wir tu°n, swelhes jares wir mu^egen oder wellen, zwischen sant Merteins tagf Tnd weichennachten vmb zwaintzich phvnt vnd vmb achthalb phvnt wienner phenning vnd zv° dehainer zeit mer in dem jar vnd swenn si oder ir erben den selben meinen tail satzes nicht lenger haben wellent, so svllen si in danne versetzen, swem si wellen, vmb alz vil phenning, alz er in von mir stet in dem rechten, als vor geschriben; stet, vnd pin auch ich fridreich der prueschinch vnd mein erbea meines tailes satzes mit der Egenanten siben phvnt geltes halber ze dem rechten, alz vor verschriben ist, meines swagers hern Dietreichs von weizzenberch vnd seiner hausvrowen vrowen annen meiner swester vnd ir paider erben oder swem si den selben satz setzent, recht gewern vnd scherm fv^er alle ansprach, alz satzvnge recht ist vnd dez Landes recht ze O^esterreich, vnd gib in darv^eber disen brief zv° einem vrchv°nde vnd zv° einem gezeuge Diser sache versigelt mit meinem jnsigel vnd mit hern Chv°nratz jnsigel dez Liechtnekker vnd mit Dietreichs jnsigel Dez jvngen weizzenberger, die diser sache gezeuge sint mit iren jnsigeln. Diser prief ist geben ze wienne Nach Cristes gepu°rt Dreutzehen Hvndert jar, Darnach in dem Nevn vnd dreizzigisten jar dez nächsten mitichen vor dem Palm tag.

Source Fulltext: OÖUB 6 (Wien 1972), S. 291f., Nr. 288