Ich Jans von Reichenstain vnd mein Housvrowe vro Ann Vnd ich Vlreich von Rejchenstain vnd mein Housvrowe vro Elspet vnd alle vnser eriben veriehen offenleich an disem prief vnd tu°n chunt allen den, die in sehent oder ho^erent lesen, die nu sint oder hernach chu°nftich werdent, daz wier mit gu°tem willen vnd mit wolverdachten mut vnd ouch mit gu°tem rat ze den zeiten, da wier iz wol getu°n machten, haben ze chouffen geben Siben halbeu gu°t, di da sint gelegen ze Nezzelbach in Ansvelder pharr, mit allen den rechten, vnd wier sew inne haben gehabt in nu°tz vnd in gewer vnd mit alle div, vnd darzu° geho^ert versu°cht vnd vnuersu°cht, Hern Vlreichen von Chappellen vnd seiner Housvrowen vron Katreyn vnd allen ieren Eriben, daz si damit schaffen schullen allen ieren willen ze verchouffen vnd ze versetzen vnd sein ouch des selben gu°tes von in gantz vnd gar gewert. Waer auer daz, daz iemant chaem, der Pezzar recht zu° dem vorgeschriben gu°t wolt haben danne wier oder vnser Eriben haben gehabt, so hab wier jch Jans vnd mein Pru°der V°lrich di Reichenstainer vnd vnser Housvrowen vnd alle vnser Eriben Dem ê genanten Hern Vlreichen dem Chappeller vnd seiner Housvrowen vnd allen ieren eriben darouf geben zv° Ainem satz Anderthalb Hundert phunt phenning wienner mu°nzz vnd schullen ouch der selben phenning sein vnd siner Housvrowen vnd aller seiner eriben gewer sein an aller der stat, swa sev sein bedu^erfen nach landes recht, Want si vns daz selb gu°t vergolten Haben mit dem gu°t, Daz im sein ê benanteu Housvrowe pracht hat. Vnde des sint gezeug di erbern leu°t Her Eberhart von walse, Her Reinprecht von walse, Her fridreich von Walse, Her Vlreich von Gru^enbu°rch, Hern (sic) Ott von Perchaim, Her Wezel von Erwing, Her Charl der rech, O^ertol (sic) der wartperiger, Seybot von Neu°nhofen, Jans der Schu°tzz vnd ander pidiberr leut genu°gch. Daz in daz staet vnd vnzebrochen beleib, gebe wier in diesen brief zv einer v^erchunt versigelt mit vnserr paider Anhangunden jnsigeln. Der prief ist geben, do man zalt von Christes pu^ert Tousent jar, Dreuhundert iar, darnach in dem Neu°n vnd dreizzigistem jar An vnser Vrowen tach in der Vasten.

Source Fulltext: OÖUB 6 (Wien 1972), S. 292f., Nr. 289