Ich Wernhart von Mezzenpach vergich vnd tv^en chvnt allen den, die disen brief lesent oder ho^erent lesen, vmbe die vier Hundert Phvnt wienner phenninge, die ich hern albern von volchenstorf an behabt han vnd da fv^er mir mein Herre Hertzoge Albrecht ze O^esterreich, ze Steyr vnd ze Chaernden jn geantwurt hat Hundert Phunt vnd zwelif phunt wienner phenninge Geltes aus dem Satze, der hern Albern von volchenstorf stet von dem selben meinem Herren Hertzog albrechten, daz ich dem selben meinem Herren der gult, die er mir ingeantwurt hat fv^er die vorgenanten vier Hundert phunt, ledich lazzen han, fv^er hvndert phvnt phenninge dar vmb, daz er mir die andern drev Hundert phvnt in gehelffe vnd mir die gu^elt, die ich da fv^er inne han, scherm fv^er alle ansprach vnd daz er mir auch geholffen sei nach seinen gnaden mit einem rechten alles des, daz ich noch ze Sprechen han hincz hern albern von volchenstorf. vnd dar v^eber so gib ich meinem herren Hertzoge albrehten disen brief ze einem vrchv^ende versigilt mit meinem jnsigil. Diser brief ist geben ze wienne nach Christes gepurt drevtzehen Hvndert iar, dar nach in dem Nevn vnd dreizgisten iar an sant Matheus tage.

Source Fulltext: OÖUB 6 (Wien 1972), S. 309, Nr. 304